-2017M.D qoqqowunnita giddo eo 12 biliyoone iillishate mixi’noonni
Addis Ababa:- Qoqqowoho haaru dirinni gibrinnu laalchonna laalchimma lossatenni sagalete wowe buuxisiisatenna heeshshote oolto ga’labbisate hixamanyine loonsannita Pirezidaantichu Desta Ledamo coyi’ri.
Sidaamu qoqqowi pirezidaantichi Desta Ledamo qoqqowu amaale mini 6ki diri 3ki loosu wogga 7ki uurrinshu songo harinsi yannara coyi’ranni; gumulamihu 2016 baajeettete dirinni qoqqowoho duuchu handaari loossa mixote garinni gumula dandiinoonni yiino.
Aananno baajeettete dirinnino dagate beeqqo latishshu widira soorratenni babbaxxitino latishshu loossa danchu garinni gumulantanno gede assate jawa illacha tungoonnita buuxisino.
Qoqqowoho lophote taqqanna jirote bu’a ikkitinore gibirrinna, saadate jiro, Industirenna daa’’attote handaarra aantetenni jawa illacha tunge loonsannita coyi’rino.
Babbaxxitino safote latishshi loossa, hattono rosunna fayyimmate handaarranni gumulloonni loossa qoqqowunniha miinju lopho buuxisiisate kaa’litannore ikkansano xawisino.
Pirezidaantichu Desta xawishshi garinni; qoqqowu keerunna ga’labbo ge’inowa ikkasinni dagate beeqqo kaajjinshe latishshu loossanni agarranni gumi maareekkamanno gede loonsanni.
Qoqqowoho 2017 baajeettete dirira 23.4 biliyoone birri ale baajeetteno amaalete mini kaajjishino.
Haaru dirinni qoqqowunnita giddo eo 12 biliyoone iillishate mixi’noonnitano pirezidaantichu qummeessino.
Baxxinohunni, gibirrinnu jawa illacha tunge loonsanniha ikkasinni; handaarunni laalchonna laalchimma lossatenni sagalete wowe buuxisiisatenna heeshshote oolto ga’labbisate hixamanyine loonsannitano buuxisino.
Qoqqowoho luphiima jirote bu’aati yine bandoonniri gibirrinnu, saadate latishshi, Industirenna daa’’attote handaarra garunni latisatenni agarranni horo afi’rate illachinshe loonsanni hee’noonnitano hattonni.
Hananfoonnihu 2017 baajeettete dirinni gumulate qixxaabbino mixonni qoqqowoho baxxinohunni gibirrinnu laalchonna laalchimma lossatenni sagalete wowe buuxisiisatenna heeshshote oolto ga’labbisate hixamanyine loonsannitano coyi’rino.
Konni handaarinni Industirete shiqinshanni waaco hala’ladunni laashshatenni gobbaydi woxu soorro lossi’rateno loosidhe galtinori dhuka loossa agarrannita buuxisino.
Qoqqowoho maatete Jireenya buuxisiisate qixxeessine loosu giddora e’noonni paakeeje gummaamma assateno ruukkado baatto aana loonsanniri gibirrinnu handaari loossa kaajjite suffanno yiino.
Konnirano, saadate sircho woyyeessatenni maatete Jireenya buuxisiissanno loossanni qoqqowu miinjanna dagoomunniha jirote dhuka lossate qinaambe loonsannitano Pirezidaantichu lede huwachishino.
Wole widoonni, gumulaminohu 2016 baajeettete dirinni qoqqowoho loonsoonniti latishshu loossa dagoomu beeqqonna horaameessimma buuxisiissinota ikkase amaalete mini miilla coyidhino.
Amaalete mini miilla songote shiqqino 2016 baajeettete diri mixote gumlshi ripoorte kaiminni wortino hedonni; diru giddo baadiyyete ikko quchummate gumulloonniti duuchu handaari loossa dagoomu horaameeyye ikkannonna beeqqonsano kaajjitanno gede jawa kaayyo kalaqqinote yitino.
Gumulamihu baajeettete dirinni daga mootimmate waatira ikkite halamatenna beeqqaanchimma lexxitanni dagginota kayissinori amaalete mini miilla; dagoomitte, miinjunna poletiku handaarranni gumulloonni loossa jawaachishshannota ikkase kayisse; daga roorenkanni latate hasidhannoha ikkasinni ledotenni ka’annota latishshu xa’mubba daganniwa shinqe harunsatenninna rahotenni dawaro qollanni hara hasiissannotano duudhe wortino.
Amsaalu Felleqe
Bakkalcho Maaja 11, 2016 M.D
