Addis Ababa:- Qoqqowoho Farcote uurrinshuwa uytanno owaante ragaanni leeltanno xe’ne danchu gashshooti qarrubba ikkite suffannokki garinni hixamanyine loonsannita Songaafitte Faantaye Kebbede coyidhu.
Sidaamu qoqqowi mootimma amaale mini qara Songaafitte Faantaye Kebbede; amaalete mini 6ki diri doorshu 3ki loosu wogga 7ki uurrinshu songo sa’u muli barrubba giddo harinsi yannara coyidhanni; amaalete mini dagoomu olloha farco afi’ra dandaannonna latishshu loossanni beeqqaanonna horaameeyye ikkanno gede kaajjado harunsonna qorqorsha assatenni hexxo aanno gumi maareekkamino yitino.
Gumulamihu baajeettete dirinni dagoomu deerru deerrunkunni hasiissanno farco rahotenni afi’ra dandaanno gede; hattono duuchu handaari latishshinni beeqqaanonna horaameeyye ikkanno garinni harunsonna qorqorsha assatenni amaalete mini agarrannisi qeecha fulino.
Baxxinohunni, Yoote minna, poolisete hattono wolootta farcote uurrinshuwara dagoomu rahotenni owaante afi’ra dandaanno garinni loosate illachishshinota dagate bare harinsoonnitano kultino.
Konninni, farcote uurrinshuwara danchu gashshooti qarrubba leeltinonsa massagaano daga keenteenna taahote qaafo adhinoonnita xawissino.
Songaafittete xawishshi garinni; farcote uurrinshuwara uynanni owaante ledo amadisiisaminohunni leeltanno xe’ne danchu gashshooti qarrubba ikkite suffannokki garinni illachinshe loonsanni.
Amaalete mini shallagote qorqosha assitanno gaamo tantanatenni gumulsiisaano uurrinshuwanna dagooma hasaawisatenni hafanfarinoha luphiima mootimmate woxe qolsiisatennino aleenni hunaano xa’mantanno gede assinoonnitano buuxissino.
Amaalete mini uurrinshunni assanno harunsonna qorqorshu loosinni ledote hedeweelcho towaanyo assatenni danchu gashshooti qarrubba tira dandiinanni mixo qixxeessine loonsoonnitano hattonni.
Gumulsiisaano uurrinshuwa keenatenni woyaawa guma maareekkisiissinore jawaachishanna xe’ne leeltinonsare taashshidhanno gede assinanni harinshono kalanqoonni.
Gibrinnu, gorsu loossa, keerunna loosu kaayyo kalaqo handaarranni gumulloonni loossa gummaamma ikkansanni; albillichono harunsonna irko kaajjite suffannota coyidhino.
Baxxinohunni, Saadatenna Qulxu’mete latishshi ragaanni hananfoonni loossa maatete Jireenya buuxisiisate dandiisiissannore ikkansanni; jawa illacha tungannita qummeessitino.
Qoqqowoho harinsanniti latishshunna danchu gashshooti loossa dagooma beeqqaano assitannota, xawadimmanna xa’mamaanchimma noo garinni mixotenni gumullanni keeshshinoonnita mitu mitu amaalete mini miilla hedonsa wortino.
Albillichono babbaxxitino qooxeessubbara loonsanniti latishshu loossa dagoomu hasatto wonshitannonna ka’anno latate xa’mubbara dawaro qoltannota ikkitanno gede assate uynoonninsa garunni fultannotano amaalete mini miilla ledde buuxissino.
Abirahaam Saamueel
Bakkalcho Maaja 11, 2016 M.D
