Addis Ababa:- Gobba anguwatenni ikkinnina arrawunni loosantannokkita Gorgoru pirojekite rosiissino yaanni Xaphoomu ministirchi Abiy Ahimed (Dr) coyi’ri. Hurbaate gobbate biso ikkitinoti Gorgora Ikko Rizoorte sa’u muli barrubba giddo giddo maassantino.
Xaphoomu ministirchi Abiy Ahimed (Dr) pirojekite faajjetenni maassire owaantete fano assi yannara saysino sokkanni; Gorgoru halchineemmoha ayno hunara dandaannokki; ajuujanke dagankera kultino huuronna hedonke huwattinokkirira xawo asse leellishino misileeti yiino.
Gorgoru rosiisinonkeri gobba anguwatenni ikkinnina arrawunni loosantannokkitaati yiinohu Xaphoomu ministirchi; gobba loosate kaajjado, bushsha cee`mitannokkitinna xeena xooqqannokki anguwa ikkinnina Yutuubete aana sutante coyidhanno arrawubba gobba ijaartannokkita Gorgoru pirojekite lawishsha ikkite sa`ino yaanni coyi’rino.
Gobba kaajjishate, keeshshiishatenna biifise ilamate tareessate loossannonna jawaattanno anguwa maa assa dandiitannoro Gorgoru pirojekitenni la”a dandoommono yiino.
Pirojekite hanafante jeefisanta geeshsha 17 hige base marinota xawise; tenne harinsho giddo Gorgoru maamiinni kae hiittoonni lophinoro la”ate kaayyo afi`rinota huwachishino.
Xaa yannara Gorgoru fidale ikke ayno rige hunara dandaannokki dhagge borreessino yee; tenne pirojekitenni dhaggenna ilama naqaashe ikkitanno yiino.
Jireenyu ajuujankenna daganke heeshsho soorrate hasattonke Gorgoru pirojekite calla loosatenni gumullannita dikkitanno yiinohu Xaphoomu ministirchi Abiy Ahimed (Dr); Gorgoru iillote hodhishshubba hasiissannosita coyi’rino. Konnirano Baaru hodhishshi owaante uytannota lame jajjabba Yowolo hidhinoonnitano huwachishino.
Tini Yowolo Gorgorunna Bahirdaarete mereero nooha hodhishshu looso lifixisate looso loossannore ikkitannota buuxise; ledoteno Federaalete mootimmanni Bahirdaarete ijaaramanni afamannonna Boole kalqoomu horophilu fooliishshonni aane Itophiyaho jawiidihanna lowontanni yannaasincho terminaale ijaarsinanni afammannita buuxisino.
Tini hodhishshu doorshuwanna ledote Hoteella heedhuro Bahirdaareno ikko Gorgora shotu garinni iillote bayicho assa dandiinannitaati xawisinohu.
Gonderete Piyaassa lede Faasiil kincho daa”attote iillora lossate koriiderete latishsha barraho hanafisiisinota kayisinohu Xsaphoomu ministirchi; bayichubba deerransa agarino garinni loosantannotano coyi`rino. Pirojekite mittu diri yanna giddo jeefisantannono yiino.
Ledoteno, daa”atto kalqoomu deerrinni luphiima gobbaydi woxu soorro eo afisiisatenninna miliyoonetenni kiirranni loossa irkisatenni kalqete miinji giddo qara qeecha fultannota xawisino.
Xaphoomu ministirchi “Hurbaate Gobbate” labbino loossa daa”attote handaara kaajjishate, baca daa”ataano goshooshate, miinju lopho baqqi assate, loosu kaayyo kalaqate, iilluwa latisatenna woyyeessate hende loosu aana hosiinsanni afammanni yiino.
Gorgora Ikko Rizoortete maasso Xaphoomu ministirchi Abiy Ahimedi kalqoomu deerransa agartino shoole iilluwa “Hurbaate Gobbate” mixo hundaanni latisate leellishino murciraanchimma ledote lawishsha ikkitanna 2012M.D sheemaate eino garinni ijaarse uyinotano buuxinsoonni.
Xaa yannara qole ajuujasi hala`liteenna ijaarshu aana nooti lamala ledote iilluwa latisate mixidhino “Hurbaate Ilamate” yaamantino haaruudde pirojekitubbano hanafisiisinota xawinsoonni.
Abbebech Maatewoos
Bakkalcho Maaja 11, 2016 M.D
