Hawaasa:- Sidaamu qoqqowira laalcho uytanno baatto aaninni Barzaafete haqqe buqqisate looso illachunni loonsanni hee’noonnita Qoqqowu Irshunna Kalaqami Jiro Latishshi Biiro egensiissu.
Biirote sooreessi kalaa Memmiru Moke xawisino garinni; qoqqowoho baattote ruukkamme kaiminni laalcho aa dandiitanno baatto garunni horoonsi’ne laalchonna laalchimma lossate hende loonsanni hee’noonni.
Qoqqowo 32 kume hekitaare baatto aana Barzaafete haqqe hala’ladunni noota xiinxallotenni illinoonni yiinohu Biirote sooreessi; tenne Barzaafe buqqinsanni wolootta sagalete wowe buuxisiisanno gidunna rumuddate sirchubba laashshate dagoomu ledo sumuu yine loosu giddora e’noonnita kaysino.
Barzaafete haqqe babbaxxitino horo heeduserono kayinnilla laalcho uytanno baatto aana hala’lite kaasama laalchonna laalchimmate aana jawa qarra kalaqqannota buuxisino.
Konni kaiminni, dagatenna qoqqowu amaale mini deerrinni hasaambe lallawa fushshine kaajjishatenni dagate ledo sumuu yinoonni garinni buqqisa hanafoonnita buuxisino.
Qoqqowoho gibrinnu latishshira hosa hasiissanno 32 kume hekitaare baatto aana noota Barzaafete haqqe tayxenni hanafe sase dirra giddo buqqisatenni basete wolootta sagalimmate hosanna laalcho laashshate mixo amande loonsanni hee’noonnita qummeessino.
Loosidhe galtinori baattonsa Weesete, gideho, laalotenna rumuddate sircho kaasate horoonsidhanni diru giddo lamenna saseegge laashshi’ra dandiitanni huwanyoote kalanqoonnikki daafira Barzaafete haqqe halashshite kaassinota kaysinohu kalaa Memmiru; konni kaiminni, Baarzaafete haqqe qoqqowoho wolootta gidu sirchubba laalchimma aana jawa qarra gantanni noota buunxoonni yiino.
Ikkinohura, tayxe dirinni 10 kume hekitaare baatto aan noota Barzaafete haqqe buqqisate hende 8 kumenna 500 hekitaare baatto aaninni kaysa dandiinoonnita egensiisino.
Konninni, 8 kume 500 hekitaare baatto haaru garinni gibrinnu laalcho laashshate hosiinsannita afi’ra dandiinoonni yiinohu kalaa Memmiru; Barzaafe kayisoonni baatto aana wolootta gidunna rumuddate sircho laashsha dandiinoonnita xawisino.
Amsaalu Felleqe
Bakkalcho Maaja 4, 2016 M.D
