– 5 xibbee miliyoone birra baajeette gaamme Gorchee umi deerri Hosipitaale ijaarate safote kincho tungoonni
Dagoominke fayyimma woyyeessate loonsanni loossara balaxo uyine loosate irko kaajjite suffannota Sidaamu qoqqowi pirezidaantichi Kalaa Desta Ledamo coyi’ri.
Pirezidaantichu tenne buuxisinohu sa’u lamalara Aliyye Sidaami Zoone Gorchee woradira mootimmatenni ijaarantanno lamu dirimi noota umi deerri Hospitaalera safote koncho tungi yannaraati.
Pirezidaantichu Desta Ledamo tenne yannara sayisino sokkann;qoqqowoho mootimma sa’u shoole dirrara doogga,xalala anganni waa,Caabbicho hattono Fayyimmanna Roso halashshate widoonni gummaamu latishshi leellino.
Fayyimmate handaarinni calla shoolu diri giddo sase hospitaalla ijaarreenna looso hanaffinota qummeessinohu kalaa Desta;15 meddissanno Hospitaaletenni Fayyimmate mereershi geeshsha noo uurrinshuwa ijaarate pirojekitubba hananfoonniha ikkanna;kuri mereerinni muli barra maassante owaantete faajje ikkitannori nootano buuxisino.
Gorchee woradira safote kincho tungoonni umi dirimi Hospitaale qooxeessu dagooma noo xeertinyinni daga tultaambetenni gatissanno yine hendannita buuxisinohu
pirezidaantichu;mootimmatenni tini Hospitaale 2-3 diri geeshsha ijaarante gooffe owaantete faajje ikkitanno gede 5 xibbee miliyoone birra baajeette amandoonnitano qummeessino.
Qoqqowu fayyimmate biiro sooreette Dr.Selaamaawit Mengesha ise widoonni; fayyimmate uurrinshuwa iillo halashshate loonsoonni loossanni 138 Fayyimmate uurrinshuwa,21 Hospitaallanna 553 wolootta fayyimmate keelluwa loonsoonni. Wole widoonni 15 ikkitannori ijaarante gooffe maassote feeffattinoreeti yitino.
Aliyye Sidaami Zoone gashshaanchi Kalaa Addisu Qaa’miso isi widoonni, Zoonete qoqqowu mootimma Miinjunna dagittete horo noonsa baca safote latishshuwa diriirsanni noota xawise;pirojekitubba fayyimma lendanna dagate horaameessimma buuxissannota ikkase buuxisino.
Kalaa Addisu,Safote kincho tungi Gorchee woradi umi dirimi Hospitaale ijaarshi seeda dirrara keeshshitino dagate xa’mo dawartinota ikkase kayisatenni qoqqowu mootimma illacha tugge dawaro qolasera galata shiqishino.
Gaazeexu Odeessaanchinni
Bakkalcho Maaja 4, 2016 M.D
