Addis Ababa:- Kalqete rakkino miinju lopho borreessiissanni afantanno boode gobbuwa mereerinni Itophiyu mitto ikkase IFDR xaphoomu ministirchi Abiy Ahimed (D/r) xawisino.
Xaphoomu ministirchi amaalete mini 36ki uurrinshu songo aana afame dagate riqiwamaano amaale mini miillara dawaronna xawishsha uyi yannara Itophiyu kalaqamunna mannu anganni loosantino qarrubba hattono asalu xiiwo dandiite rakkino miinju lopho borreessiissanni noo gobba ikkase coyi`rino.
Baajeettete dirinni 17.5 xibbuunni asalu xiiwo ajisha dandiinoonnitanna aantete 10 xibbuunni heeshshi assate mixi`ne loonsanni hee`noonnitano huwachishino.
Xaphoomu ministirchi asalu xiiwo shotisatenninna eo gamba assinanni amanyoote lossatenni ilamate asalunni co`itte ikkitino gobba ragisiisate illacha uyne loonsanni hee`noonnita xawise; raaqonna kontirobaande gargadhatenni dagankeha latishshu horaameessimma buuxisiisate baalunku hajo la`anno bissa beeqqo hasiissanno yiino.
Amandoonni baajeettete dirinni gibirinnu handaarinni 6.2 xibbuunninna industirete handaarinni 10.1 xibbuunni hattono owaantete handaarinni, diilallote doogonna fayinaansete sekitere lede xaphooma 7.9 miinju lopho agarrannita xaphoomu ministirchi Abiy Ahimed (D/r) huwachishino.
Fulote daddalinni bunu, caate, culkunna shiilote handaarinni woyyino guma abba dandiinoonnitanna industirete waacubba gobbate giddo laashshatenni gobbaydi soorro xiiwo 40 anga xibbuunni shotisa dandiinoonnitano buuxisiisino.
Xaphoomu ministirchi waagu lexxo dandaatenna hasattotenna shiqishote mereero noo badooshshe ruukkisate laalchonna laalchimma lossatenni qansootu umonsa sagalsa dandiitanno gede illacha uyne loonsanni hee`noonni yiino.
Daanno diro 24 miliyoone hekitaare baatto hawuurate mixi`ne loonsanni hee`noonnita xaphoomu ministirchi Abiy buuxisiise; mixote gumulora hajo la`annonsa bissa qeechanfa fula hasiissannotano qummeessino.
Itophiyu dagoomittete handaarranni haammata seyuubba borreessiissino yiinohu xaphoomu ministirchi; baxxinohunnino loosu kaayyo kalaqonni, rosunna fayyimmate handaarranni leeltanno gumma borreessantinota lawishshunni kaysino.
Soorrote mootimma rosu handaari lophonna islanchimma woyyaabbanno gede illacha tugge loonsanni noota xaphoomu ministirchi Abiy Ahimed (D/r) xawise; sa`u lame dirra kawa 30 kume ali balaxote rosi minna ijaarroonnita buuxisiisino.
Mootimma illetenni la“a dandiitannokki qansootira deerrasi agarino gallanni ronsanni rosi mine loossinotano xawisino.
Itophiyu giddo baatto loosidhe galtino daga heeshsho woyyaabbanni dagginota xawisinohu xaphoomu ministirchi Abiy Ahimed (D/r); kayinni olantonna rosiisaano gobba agaratenna ilama suwisate luphiima waaga baattanni nooha ikkirono hakko bikkinni horaameeyye ikkitinokkita huwachishino.
Aanteteno olantonna rosiisaano woyyino garinni horaameeyye assate mootimma illacha uytannota xawise; xa baattanni noo waagira galata shiqishino.
Xaphoomu ministirchi Abiy Ahimed (D/r) fayyimmate handaarinni qansootunniha addaxxissanno fayyimma agaratenna dhibba gargadhate babbaxxitino kittiwaatubba iillado ikkitanno gede assinoonni yee; gobbate giddo 36 anga xibbuunni babbaxxitino xagga laashshatenni shiqishote diwo lophitanni dagginota xawisino.
Gobbate babbaxxitino qooxeessubbara mootimmatenna hallanyu dureeyyenni haammata hospitaalla ijaarantanni noota buuxisiisino.
Abbebech Maatewoos
Bakkalcho Maaja 4, 2016 M.D
