Addis Ababa:– Wedellu mimmito maccishshatenna hasaawate bude lossi’ratenni gobboomu amaalammera qeechansa fultanno gede Gobboomu Amaalammete komishiine qaru komishiinerchi pirofeeser Mesfin Ariaya woshshatto assino
“Wedellu qeechinna beeqqo gobboomitte amaalammera” yaanno adawarshinni Gobboomitte Amaalamme komishiine qixxeessitino hasaawu bare tenne lamalara Addis Ababaho harinsoonni.
Bareteno baalante gobbate qooxeessubbanni filantinoro 200 ale ikkitanno wedelli beeqqitino.
Komishiinennihu qaru komishiinerichi pirofeeser Mesfin Ariaya tenne yannara coyi’ranni; wedellu hasaawunna mimmito macciishshamate bude lossi’ratenni gobboomitte amalaammera qeechansa fultanno gede xa’mino.
Keerunna ga’labbo noo gobba ijaarate harinshora wedellu qeechi luphiima ikkasino kaysino.
Ilamate mereero heera hasiissanno amaalammera hattono gobboomitte maalammera wedellu qeecha lossa dandiinanni harinshubba lainohunni komishiinete komishiinerooti hasaawaho kaima ikkitanno hedo shiqishsheenna torbinoonni.
Itophiyu Gobboomitte amaalamme komishiine ajanda badate hasaawu gafa konni albaanni Addis Ababaho harinsoonniti qaangannite.
Addi addi siviile maamarranna uurrinshuwa riqiwamaano, mootimmate loosu massagaano, poletiku paartuwanna babbaxxitino eewaancho xiiwo kalaqa dandiitanno hallanyooti, babbaxxitino dagoomu bissa riqibbino bissa gamba assinoonni ajanduwa hasaawaho shiqishshino.
Wolootta qoqqowubbanna Dirre Dawu quchumi gashshootira amaalammete ikkitanno ajanduwa gamba assate loossa harinsannitano komishiine egensiissino.
Gaazeexu Odeessaanchinni
Bakkalcho Maaja 4, 2016 M.D
