Addis Ababa:– Hawadi yannara gananno du’ma xeena harunsite qoqqowoho lolahunna amadantino dano kalaqantannokki gede hasiissanno qixxaawo assinanni hee’noonnita Sidaamu qoqqowi way biiro xawissino.
Biiro qoqqowu danote bidhatto komishiine, Hawaasi Yuniversitenna gibrinnu biiro ledo qinaambe dano gargadhate addi addi loossa gumullanni hee’noonnita buuxissino.
Sidaamu qoqqowi way biiro way xiinxallonna gashshooti dayirektoreete dayirekterchi kalaa Laanqamo La’misohu Itophiyu pireesete uurrinshara xawisino garinni; albiidinke hawadi yannara hee’ranno du’mu xeeni ledo amadaminohunni mannunna jajju aana dano iillitannokki gede addi addi qorophishshu looso loonsanni hee’noonnita coyi’rino.
Konninnino Sidaamu qoqqowira xeenu korkaatinni lalohu danonna tige to’anno yine huluullammanni qarqartora heedhanno dagara huwanyo kalaqate looso loonsanni hee’noonni. Dano kalaqantara dandiitanno yine bandoonni qarqarto mereerinni qarunni Hawaasi quchuminna Hawaasi gaangaawi woradi balaxotenni kullannire ikkitanna tenne qarqartora roorenkanni garbu wo’manna lolahu haranno doogo tu”amate ledo amadante lolahu dano kalaqantannokki gede balaxotenni qorophishshu qixxaawo assinanni hee’noonni.
Gumullanni hee’noonni loossa mereerinni tullote qooxeessira lolaho gargarate baalante woraddara chigginye kaasatenna Hawaasi quchumira lolahu ha’ranno doogo fannanni hee’noonni yinohu kalaa Laanqamo; dano kalaqantannohu lolahu doogo ishinunni tuanturonna baatto mulla ikkiturooti yaatenni danote kaima ikkitara dandiitanno korkaatta qaagiissino.
Konni daafira wo’manti qoqqowu daga qarqarinsara tenne hawadi yannanni chigginye kaasatenni lolahu dano gargadhanna haanju harumi mixo gumulsate qeechansa fula hasiissannonsata huwachishinno.
Ledoteno daga lolahu ha`ranno doogo fanatenninna du’ma xeena gananna mininni fula hoogatenni hawadi xeena harunsite kalaqantanno hiittenne danonni umonsa agadhitanno gede kalaa Laanqamo sokkasi sayisino.
Qiddist Gezzaheny
Bakkalcho Ella 27, 2016 M.D
