Qiddist Gezaheny
Techo xiiwo kalanqeemmo yitanno gobbuwa Itophiyu jawa gobba ikkasenni ledote loossannore seekkite affino; yanna yannatenni kainose diinna saalsiisse qolate dhagge noose gobba ikkase dhagge garunni afa hoogansanni sodhanni noota dhaggete xiinxallaanchi pirofeeser Laaphiso Gedeleebohu xawisi.
Pirofeeser Laaphiso Addis Zemeni Gaazeexi ledo assino hasaawinni ; Itophiyu jawa gobba ikkasenni ledote loossannore seekkite affino gobbaati. Yanna yannatenni ka’inose diinna saalsiisse qolate ikkinnina qeelamatenna soqqamaanchimmate dhagge noose gobba di ikkitino. Konnira xaa yannara xiiwo kalanqeemmo yitanno gobbuwa sodhanni noohu dhagge garunni afa hoogansanniiti.
Pirofeeser Laaphiso xawishshi garinni; Aduwu oli Itophiyu qansooti hiittenne wolqanni amado’ya di siyatisiinseemmo yaatenni assitinno sharronni dhaggete qeelle borreessiissino hegere naqaasheeti. Techo Itophiyu aana xiiwo kalaqatenni cancishaano HWHTnna irkisaanonsa keeshshiishatenni uminsa hasatto wonshirate assinanniti hasiissannokki xiiwo tenne dhagge huwata hoogatenni daggino sodhino harinshooti yino.
Itophiyu qeelamanna anga aa hoogate dhagge qoolinni nabbambanniti qeellete yinohu pirofeeser Laphiso; Itophiyu daga amalinsanni hirama egentinokki ; Itophiyu daga afuu batinyi babbadinsakkinni daanno coyra halantanno, mittimmatenni uurrite qeeltanno dagaati yino.
Hiikkunni dirira nooti Itophiyu mootimma ayeerano hirante egenna hoogansanni aleenni Afriku wolaphoranna mittimmara uurritinore ikkansa kaysatenni; Atse H/ Sillaase Afrika mitto asse qineessino harinsho tennera lawishsha asse kaysanno. Konni assootisinnino Itophiyu mootuullinna massagaano hiikko garinni diinu Itophiya siyatate kai yannara umi uminsa sharro assite techoo Itophiya ilamate keeshshiishshino; Atse Tewodroosi gedeerino Itophiyu daga mitto assatenna mittoonsate kaino illachira kakkalamate geeshsha iillitinore ikkansa huwachishanno.
Techo hunote assootira bobbakkinori HWHT gaamo konni alba biilloonye amadansara albaanni 17 dirrara Itophiya qassanni keeshshitinota kaysinohu Pirofeeser Laaphiso; biilloonye amaddinohuno Ameeriku mootimma irkonni ikkinota coyi’rino.
Bakkalcho Woxawaajje 13, 2013
