Hawaasa:- Sidaamu umosi dandee qoqqowunni gala hanafi kawa laashshaano industirra laalchonna laalchimma leddannore seerunna amanyootu woyyaambe lendanna wo’munku ragi irko aatenni qoqqowoho industirete laalcho laashshate dhuka 44 angara noowiinni 57 angawa lossinoonnita qoqqowu industirete latishshi biiro xawissu. Sidaamu qoqqowo ikkihu gedensaanni laashshaano industirra uurrinsoonnita buunxoonni.
Biirote sooreessi kalaa Gosaye Godaanihu qoqqowoho towanyo assitino odeessaanote gaamora uyino xawishshinni; Sidaamu qoqqowunni tantanamara albaanni laashshaano industirra duuchu dani qarrinni sarraaqamansanni laashshate dhukinsa ajinoho. Tenne hedote giddo woratenni qoqqowo ikkinihu gedensaanni laashshaano industirra laalchonna laalchimma lossanno seerinna amanyooti woyyaambe assine wo’munku ragi harunso assinanni hee’noonni. Konninnino qoqqowoho insustirete laalcho laashshate dhuki qoqqowo ikkate albaanni noowiinni 44 anga xibbuunni noowinni 57 angara lossinoonni.
Soorrote gedensaanni haaruudde woyi woyyaabbe shiqqino qoqqowunna gobboomu poolise laashshaano industirrano ikko investeroota jawaachishshannoreeti yaannohu kalaa Gosaye; mitte uurrinsha irkonni calla laashshaano industirra laalchonna laalchimma buuxisa didandiinanni. konni daafira hajo la’annonsa bissa qinaambe xa’manno. Baalanti hajo la’annonsa bissa qinaabbe qeechansa fulate dandiiSsannonsata seeru hanqafo fushsha hasiissannota ikkite afamasenni Sidaamu qoqqowi industirete latishshi amaale mini urrinsoonnita coyi’rino.
Baalanti hajo la’annonsa bissa amaalete mini miilla ikkansa qummeesse; hajo la’annonsa bissa agarranninsa irko yaano; waacotenna womaashshu shiqisho, loosu basenna w.k.l… qinaabbe laashshaano industirrara shiqishshanni afantannota qummeessino.
Konninnino Sidaamu qoqqowi uurrinsi yannanni hanafe tayxe diro lendanna shoole dirra giddo 60 kume toone addi addi waaco shiimaadda, mereerimanna jajjabba laashshaano industirrara shiqqinota biirote sooreessi kalaa Gosaye qummeesse; 1.3 miliyoone birri liqoo looso harisatenna loosu maashine hirora shoole dirra giddo laashshano industirrara shiqqinota coyi’rino.
kalaa Gosaye shoole dirra giddo 800 ikkitanno laashshaano industirrara Ekistenshiinete qajeelsha uyinoonnita kayse; baxxinohunni qoqqowo ikkinihu gedensaanni handaara karsantanno bissara injoo kalaqatenni 300 haaruudde shiimaadda, mereerimanna jajjabba laashshaano industirra fannoonni yino.
Laashshate dhukinsa ajinore 1 kumenna 81 shiimaadda, mereerimanna jajjabba laashshaano industirra irkisatenna jawaachishate loossa gumulantino yinohu biirote sooreessi; koroonu vayirese, AGOA cufamanna babbaxxitino korkaattanni cufantino 40 laashshaano industirra giddo 33 marro loosu giddora eessa dandiinoonnita xawisino.
Qoqqowu gede tini loossa gumulamansanni gobbate gede Itophiyu laashshona millimillo hanafama qoqqowoho industirete laalcho laashshate dhuki qoqqowo ikkate albaanni noowiinni 44 anga xibbuunni 57 angawa mereerimunni lophinota huwachishinno.
Qoqqowoho 54 laashshaano industirra lamala shiimaadda handaarranni gobbayidinni e’’anno laalcho gobba giddo riqiwate loossanni afantannota xawise; sa’u lame dirra giddo gobbayidinni e’’anno laalcho gobba giddo riqiwatenni 750 miliyoone doolaare gobbayidi soorro fulo gatisa dandiinoonni. Hattono shoole dirra giddo 3 kumenna 500 toone laalcho gobbayidi dikkora shiqishatenni 238 Miliyoone doolaare ale gobbayidi soorro e’’o afi’noonnita coyi’rino.
Handaaraho shoole dirra giddo 65 kume qansootira loosu kaayyo kalaqantinota kulloonni.
Qiddist Gezzaheny
Bakkalcho Ella 27, 2016 M.D
