Abrahaam Saamueel
Hawaasa:- Sidaamu Dagoomi Qoqqowi Amaale mini 5ki doorshi umikki loosu diro 3ki uurrinshu songo barra 23/11/2013 M.D kayise 01/12/2013 M.D geeshsha harisinoti qaangannite. Tenne songo aana amaalete mini songora afii fanote hasaawa assinohu Qaru Songaafichi Kalaa Salamooni Laallehu konni dirira Sidaamu baxxinohunni Itophiyu mittimma kaajjite sufanno gede hala’lado looso loonsoonnita buuxisin.
Anfintenni gede sayinsummo sasu diri Itophiya jifannori bati”rino dirooti. Ikkollanna Sidaamu daga mittimmatenni Itophiya gatisate widoonni fultino qeechi dhagge habbannokkiho. 27 diri giddo winxoonni mimmito huluullamatenna babbadamooshshu danqara hiiqqitino Sidaamu daga aliyye widoonni ka’ino urde gaadatenni assitino mittimma diina saalfachishshinote.
Amaalete mini Qaru Songaafichi Kalaa Salamooni Laallehu coyronte gede, tayxe diro qoqqowinkerano ikko gobboomu deerriinni xaaddinoti jifonna qarru konneeti yinanniha ikkinokkita kule, tenne xaaddinonke mitiimmanna shetto tirate, Itophiya albira qaafisiisatenna gobboomu mittimma kaajjite sufanno gede assate Sidaamu daga jawaatte loossino dirooti yiino.
Songaafichu yiinonte gede, diinu hedo Itophiya billaalisate ikkinotanna xaano goxinokki daafo tenne anfe sharramatenni jaawata daganke ledo mittimmate halamme allagicho Junta wirro ka”annikita assine waamatenni Itophiyu jireeyna buuxinseemmo yiino.
Itophiyu daga Tigirayete daga gawajjantanno yite urde uurrisinoti sumuu yitinosikkki Junti xaano wirro kakkae ola fansiise Itophiyu daga ge’annoikki gede assanni noo daafira konne Juntu faninonke ola galchine badhera qolatenna Juntaho biilloonyu amasi unuuna ikkinota afanno gede Sidaamu dagano wolootu dagoomi ledo buusante Junta waamma geeshsha murcidhe gaadu baychi geeshsha hadhe waaga baattanni hattono hasiissanno irko assitanni noota buuxisiisino.
Wole widoonni Amaalete miniti dirunniti loosu ripoorte danchu garinni gumulantinota ikkirono, kaajjadu midaadi noo gede laafu midaadi nootano kulino.
Amaalete mini bainchonna bushu assooti loosi qoqqowu giddonni hunate assino towaanyonni duucha foonqe bande tirate wo`naaloonnita xawise, mooranonna daga gawijjitinori xa’mammantanno gede assate la’anno bissara egensiisinota Songaafichu xawisino.
2013 M.diri amaalete mini jeefishshi loosu riipoorte Ayiradu amaalete mini hasaawa assihu gedensaanni wo`ma huuronni kaajjishino.
Bakkalcho Woxawaajje 13, 2013
