Addis Ababa:– Sidaamu qoqqowira dikko geisate gumulantanni afantanno gumaame w`naalshubba kaajjite suffannota Sidaamu qoqqowi jireenyu paarte sinu borro mini sooreessi kalaa Abrihaam Marshallo egensiisi.
Qaqqowu daddalunna dikkote latishshi biiro “daddalu amanyoote yannaasincho, lifixanna tekinolojetenni irkisaminoha assatenni heeshshote oolto geisate jawaanteemmo” yitanno hedonni deerru deerrunkunni afantanno hajo la`annonsa bissa ledo qinaambetenni loosate dandiissanno milli millote bare harissino.
Milli millote bare massaginoh Sidaamu qoqqowi jireenyu paarte sinu borro mini sooreessi kalaa Abrihaam Marshallohu; gobbate gede baalunku dagoomu kifilla ledo assinoonni hasaawubbanni qarunni ka`anno xa`mubba mereero heeshshote oolto geisate hajo mitto ikkitinota kayse; heeshshote oolto geisate mootimma wortino faasho mereerinni hala`ladunni laashsha, industirete laalchimma lossanna geexaanotenna laashshaanote mereero suwashsho daddalu amanyoote diriirsa ikkitinota huwachishino.
Kalaa Abrihaami daddalu xaadooshshe keeraatunniha assate massagaano hajo la`anno bissa ledo qinaawatenninna murciraanchimmatenni massaga agarantannota coyi`re; kaajjado massagooshshu amanyootinni qoqqowunniha daddalu amanyoote yannaasincho assatenna heeshshote oolto geisate hajo la`anno bissa jawaantetenni loosa hasiissannonsa yiino.
Mootimma heeshshote oolto woyyeessatenna dikkote waaga geisate suffote qaafubba adhitanni afantanno yiinohu sooreessu; ikkollana xaano sa`noommokki qarrubba ragaanni kaajjado hasaawa assatenni aantete faasho worrannitano buuxisino.
Qoqqowu daddalunna dikkote latishshi biiro sooreette dukko Selaamaawiit Mekuriyiti ise widoonni; heeshshote oolto geisate qidaamenna sambatu barra uurritanno dikkuwa qoqqowoho hala`litanno gede assatenninna daddalu amanyoote yannaasincho assate haammata loossa gumulantanni keeshshitinota buuxisse; heeshshote oolto woyyeessatenna dikko geisate biiro gumultanno loossa gobbaanni qinaambete loosi hala`ladunni hasiisannota xawissino.
Abbebech Maatewoos
Bakkalcho Ella 27, 2016 M.D
