Hawaasa:- Qoqqowoho tayxe baajeettete dirinni 53 kume ali qansootira uurrinshunni loosu kaayyo kalanqoonni 6 kume ikkitanno Interpirayzoota reekkinoonnitano xawinsoonni.
Biirote Sooreette Dukko Hageretsiyoon Abbebe qoqqowoho handaaru loossa towaatte la’ino odeessaanote gaamora uytino xawishshinni; tayxe dirinni qoqqowoho 7500 ale ikkitanno Interpirayzooti deerra reekkate mixi’ne xaa geeshsha 6 kume ale ikkitannore shiimmaaddunni manaaddu widira; manaaddunni kayinni mereerimu widira reekkantino.
Konni albaanni loosu kaayyo kalaqora liqiissineenna qolamikkinni keeshshinoha 136 miliyoone birra sa’u tonne aganna giddo qolsiinsoonnitano Sooreette egensiissino.
Qoqqowoho seerimale doogonni 17 dirrara amadante keeshshitinota 1300 laashshinanninna hirranni sheede qolsiisatenni looso hasidhanno wedellira sayinse uynoonnitano hattonni.
Sooteettete xawishshi garinni; qoqqowoho loosu kaayyo kalaqora liqiissineenna qolsiinsoonnikkihu 400 miliyoone birri asale ikke no. konni giddonni 2016M.D baajeettete dirinni 160 miliyoone birra qolsiisate mixi’ne sa’u tonne agannara calla 136 miliyoone birra qolsiisa dandiinoonni.
“Loosu kaayyo kalaqo handaarinni jawa jifo ikkinohu liqoote woxe qolsiisate loosooti” yinoti Dukko Hageretsiyooni; konni albaanni loosu kaayyo kalaqora liqoo adhite qoltinokki bissa no. wolu garinni kayinni mootimmate loosaasine, massagaano, dureeyye liqoo adhiturono qola hoogansanni xa’mantannokki harinsho no. Konne liqiissineenna qolaminokki woxe qolsiisatenni looso hasidhanno wedellira saysa dandiiniro handaarunni jawa soorro abba dandiinanniha ikkasino huwachishshino.
Xa amandoonni harinshonni liqoo qolsiisate dhuki lexxanni dayinota kayissinoti Biirote sooreette; sai 2015M.D 90 miliyoone birra; tayxe dirinni kayinni sa’u tonne agannara calla 160 miliyoone liqoo qolsiisate hende 136 miliyoone birra qolsiinsoonnita buuxissino.
Laashshatenna qixxeessinoonni laalcho hirate ikkitanno sheedda looso hasidhanno wedelli xa’mo ikkitinota kayissinoti Sooreette; konni ragaanni sa’u 17 dirrara hallanyootunni amadante keeshshitinota 1300 sheedda qolsiinstenni hattono 300 haaruudde ijaarsatenni xaphoomunni 1600 laashshinanni sheedda wedellaho sayinsoonnita xawissino.
Hattono hasiissannokki doogonni amadante keeshshitinota 50 hekitaare baatto qolsiinsoonniha ikkanna; sa’u 10 agannara 800 hekitaare ale baatto wedellaho sayinsoonni yitino.
Konni dirinni baankuwatenninna hallanyootu uurrinshuwanni shiqinoha lendikkinni mootimmatenni calla 175 miliyoone birra sa’u tonne aganna giddo looso kalaqqino wedellira liqiissinoonnita qummeessitino.
49 kume ale ikkitanno wedellira harancho yanna qajeelsha uyneenna loosu giddora e’inoha ikkanna; 53 kume ikkitanno qansootira uurrinshunni loosu kaayyo kalaqantinota Biirote Sooreette ledde buuxissino.
Amsaalu Felleqe
Bakkalcho Ella 27, 2016 M.D
