Addis Ababa:- Danchummate fajjo owaante loossa ha’nura kaa’lamate rosicho kaajjishatenni haammata dagoomitte qarrubba tirantanno gede assitanni noota xawinsoonni.
Tayxehu hawadi yanna danchummate fajjo owaante loossa babbaxxitino qoqqowubbara harinsanni hee’noonni.
Sidaamu qoqqowirano 2016 M.D hawadi yanna dancha fajjo owaante loossa hanafiisiinsoonniha ikkanna; Xaphoomu ministirchi borro mininna woshshamaano uurrinshuwa loosu sooreeyye oyimbarra qoqqowoho handaaru owaantenni dhuku noonsakkirira mine gatamaratenna chigginye kaasate amuraate harissino.
Xaphoomu ministirchi hobbaatu amaalaanchi minister Dieetichi kalaa Mekiyu Kedir tenne yannara coyi’ranni; gobba lophitannohu mootimmate loosinni calla ikkikkinni daga dancha fajjo owaantenni uminsa qeecha fula dandiituro ikkinota huwachishino.
Xaphoomu ministirchinna 18 woshshamaano uurrinshuwa massagaano Sidaamu qoqqowira dhuku noonsakki maatera hee’nanni minna ijaarsha hanafisiissinoha ikkanna; minnate ijaarshi aantanno lame aganna giddo goofanno. Ledoteno, lame aganna gedensaanni rosaanote hasiisannore irko assitannota Dieetichu qummeessino.
Borrote mini sa’u dirrara danchummate fajjo owaantenni babbaxxitino qooxeessubbara minnate gatamarshanna ijaarsha loosinota kule; kunino, hananfoonni loossa harancho yanna giddo isilanchimma noo garinni loosantanno gede assinoonnita huwachishino.
Minister Dieetichu xawishshi garinni; danchummate fajjo owaante loossa dagoominke giddo ha’nura ikkinoha mimmito irkisatenna kaa’lamate rosicho kaajjishannonna duuchu handaarinni xaaddannota dagoomitte qarrubba tirannoha ikkasi coyi’rino.
Sidaamu Qoqqowi Meentu, Wedellunna Dagoomitte Hajubba Biiro Sooreette Dukko Immebeet Issayyas ise widoonni; qoqqowoho hawadi yanna danchummate fajjo owaante loossa wedellunni sae baalanti dagoomu bissa beeqqaano ikkitanni afantanno yitino.
Tayxehu hawadi yanna dancha fajjo owaante 2 kumi ale ikkannoha dhuku noonsakki maate minna ijaarate mixi’noonnita xawisse; minna ijaaratenni ledote eo afidhanno injoo kalaqatenni horaameeyye assate loonsannita xawissino.
Qoqqowoho tayxe hawadi yanna dancha fajjo owaantenni 760 kume ale wedelli beeqqitannoha ikkanna; 1.6 miliyoone ale dagoomu bissa horaameeyye ikkitannota coyidhino.
Amsaalu Felleqe
Bakkalcho Ella 27, 2016 M.D
