Addis Ababa:- Amandoonni baajeettete dirinni sa`u 11 aganna giddo 252 kume toone buna gobbaydi dikkora sonke 1.28 biliyoone doolaare eo afi`noonnita Itophiyu bununna shaete biilloonyi egensiisi. Bunu islanchimmanna dikkote doorshuwa halashshate loosantino loossanni Itophiyu buni 18 anga xibbuunni lopho leellishinota xawinsoonni.
Itophiyu bununna shaete biilloonyi qaru dayirekiterchi Addunya Debela (Dr) Itophiyu pireesete uurrinshara xawisino garinni; 252 kume toone buna sonke 1.28 biliyoone doolaare eo afi`noonni.
Ellu agani giddo 45 kume toone geeshshi buna sonke baajeettete diri goofimarchira 1.45 biliyoone doolaare eo afi`rate illacha assinoonni yiino; suwashsho dikkirate amanyoote loosu aana hosiisa hananfihu gedensaanni baalunku handaarinni guma afisiisanni noota buuxisiisino.
Saudi Arebiya, Jaappaane, Ameeriku, Beljiyemenna Jermene batinyunni Itophiyu buna hidhatenni egennantino gobbuwa ikkansa xawisino.
2011 M.D gobbaydira sonkoonni laalchu bikki giddonni suwashsho dikkira gumulloonnihu 7 anga xubbuunni calla ikkinota buuxisiise; konni baajettete dirinni suwashsho dikkiranni sonkoonnihu 90 anga xibbuunni ale iillinota coyi`rino.
Dokiter Addunyi xawishshi garinni; konni albaanni laalchu dikko widoonni sa“anni noohu xaa yannara doorshu gede ikke soyaanonna shiqishaano mimmitinsa ledo coyi`rante, islanchimmatenna waagu aana yekkeerante dikkidhanno gede assa dandiinoonni.
Bunu soyaanonna shiqishaano shuwashsho xaaddonni xaadissara dandiitanno bunu egzibiishiine qixxeessinannitano egensiisino.
Bunu egzibiishiine Hawaasa ella 21-22 geeshsha hattono Jimmaho 26-27/2016 M.D geeshsha harinsanni yiino.
Dikkirate amanyoote yanneessatenni baxxinohunni baatto loosidhe galtinori horaameeyye ikkitanno gede assine shuwashshunni ekispoorte assa dandiitanno hattono shiqishaanono sayikki bisi anga worikkiinni shuwashshunni baatto loosidhe galtinoriwiinni laalcho hidha dandiitanno gede assinoonni.
Suwashsho dikki`ranni baatto loosidhe galtinori laashshitinno bikkinni horoonsidhanno gede, sonkannihu bunu islanchimma deerri luphi yaanno gede; handaarunni gobbaydi soorro lexxitanno gede hattono gobbaydira sonkanni bunu bikki luphi yaanno gede dandiisinotano dokiterchu Addunyi huwachishino.
Dokiter Addunyi ledeno; xaa geeshsha 300 ali shiqishaano egzibiishiinetenni beeqqate borreessante laalchu akeeka shiqishshino yiinoha ikkanna; xibbuu ale soyaanono beeqqate hasatto leellishshino buuxisiisino.
Egzibiishiine handaarunni afi`nanni horo roorenkanni lossate kaa`litanno yiinohu dokiter Addunyi; egzibiishiinete qoteho babbaxxino gutu hasaawa assinanni yiino.
Dokiter Addunyi; Itophiyaho noo buna laashshate dhuki kaiminni afi`nanni gobbaydi soorro eo aana hala`ladda foonqubba noota kayse; xaa yannara noo kaayyubba halashshine horoonsi`rate illachu ragubba bande loonsanni hee`noonni yee xawisino.
Abbebech Maatewoos
Bakkalcho Ella 20, 2016 M.D
