Addis Ababa:- Dagate riqiwamaano amaale mini kiiso baatate yawo safote latishsha kaajjishshanno uurrinsha aaninni kayse qoqqowunna quchumu gashshootta bissara saysate dandiisanno lallawa kaajjishino.
Amaalete mini harisino 34ki uurrinshu gambooshshi aana dagate horora yine baattote amado agurranni, kiiso baantannihanna jajjinsa aaninni ka’inore marro uurrinsanni akata mu’rate shiqinshoonni lallawu hedo kiiro 1336/2016 ikkite kajjitino.
Lallawu mixo aana rippoortenna murote hedo shiqishshinoti amaalete mini quchumu safote latishshinna hodhishshu hajubba uurrinshu komite gambisaancho dukko Shewwiit Shankati; lallawu labbanno pirojektuwa labbanno fulonna gamba yitino yannanni jeefantanno gede dandiissanno hayyo diriirsinoonnita xawissino.
Federaaletenna qoqqowu annimmanni loosantanno pirojektuwa labbanno kiisonna waagu fushshonni loosantannonna badooshshe ruukkissara dandiitanno hayyo kaajjishshinota ikkase xawissino.
Danna agarsiisate loosi, jajja kaysiisate loossa gumulate kalaqantara dandiitannota hasiissannokki xiiwo gatissannota, jajjaho waaga fushshitanno bissa wole baatannohu kayinni wole ikkasinni annimate ayyaaninni gumullikkinni keeshshinoonnita qummeessitino.
Kiiso baatate harinsho aana jajju fushshanno waaginni aleenni lowo geeshsha luphi yino waaga baantanninna adhitanno yanna lowo geeshsha seeda ikkasenni hedatenna baatate looso xaphi assine mittowa abbatenni iillitanni noo billaallanna pirojektuwate goshooshama qarra gatissara dandiitannota xawissino.
Amaalete mini miilla insa widoonni; lallawu latishshu goshooshamannokki gede, latishshu loossa garunni loosantanno gede assitannota ikkasenni dancha ikkiturono; aganu baatooshshe baatate dandiitinokkiri; asalu kuusaminonsa qoqqowubba hiittoonni kiiso baata dandiitannoro xa’mo kayissino.
Ikkollana jajjaho waaga fushshanna kiisa baatate amanyooti xaano mussinnahonna bainchu assootira reqeccaawinoha ikkasi kaysino. Waaga fushshannohuno mitteenni noowa roorenkanni looso sarraaqatenni mooraho injiinoha ikkanno gede assitinno yaatenni naqqassino. Fushshinoonni waaga baantanni harinshora xawado amanyoote diriirsa hasiissannota coyidhino.
Seerunna farcote hajubba uurrinshu komite gambisaancho dukko Itsegennet Mengistuti; konni alba noohu kiiso baantanni amanyooti bainchu assootira reqeccaawinoho; latishshaho jajjinsanni ka’ino mannooti hasiissanno kiiso afidhannokkiha ikkasino kayissino.
Woyyaawino lallawi mootimmatenna dagate jiro billaallitannokki gede dandiisannoha ikkasi; farcote amanyooti aana ruukkitino farco wole kiiso gede afi’rinokkihu aliidi farcote bissa geeshsha yekkeeramatenni qoossosi agarsiisira dandaannota qummeessitinno.
Qoqqowubbanna quchumu gashshootta haaruudde pirojektuwa amaddanno woyte kiisote baatooshshira hossanno baajeette federaalete mootimmanni ledote baajeette gaammanni gede heda amaalete mini iillinohu jajju taakse lallawi kaajjeenna gumullanni yannara qoqqowubbanna quchumu gashshootta gamba assitanno woxe konni illachira horonsidhanno gede assate sumimmete aana iillinoonnita xawissino.
Qiddist Gezzaheny
Bakkalcho Ella 20, 2016 M.D
