Addis Ababa:- Sidaamu qoqqowira keeshshitinore lendanna 145 babbaxxitinori mootimmate pirojektuwa gatamarshinsa jeefaminota qoqqowu quchumu latishshinna Konistiraakshiinete biiro xawissino. Sa’u tonne aganna giddo pirojektuwate gatamarshi 3.4 biliyoone ale ikkitino fulonni jeefaminota biiro buuxissino.
Sidaamu qoqqowi quchumu latishshinna konistiraakshiinete biiro woshshamaancho uurrinsha konistiraakshiinete biilloonyi qaru dayirekterchi kalaa Mebraate Mellesehu coyi’ranni; hanafante uurritinorinna loossanno urrinshuwa ledo sumimme kalanqoonniri 2.5 biliyoone birri ale baajeette xa’mitannori 117 pirojektuwa hee’ransa kayse; kuri pirojektuwa giddonni roore anga jeefantinota buuxisino.
Wole widoonni hatte yannara gatamarshu uduunni aana waagu lexxo kalaqamase kaysinohu dayirekterchu; qoqqowu mootimma sharronni kalaqantino soro taashshine baajeette gaamme gama pirojektuwa jeefante owaantete aana hossanno gede assinoonnita coyi’rino.
2017 umi bocu boci yannanni gattino pirojektuwa jeefisate mixo amandoonnita qummeessino.
Gatamarshu uduunni waagi yanna yannatenni lexxanni ha’rirono islanchimmatennino ikko amandoonni yannanni pirojektuwa jeefisa rosantanni daggino yinohu dayirekterchu; yannatenni jeefisa jawaachinshannita ikkiturono islanchimmate aana qarra kalaqqannore seeru garinni qorichinshannita coyi’rino.
Konistiraakshiinete handaari moorahonna bainchu assootira reqeccaawinoho yaannohu qaru dayirekterchu; konne qarra gargarate dandiisanno amanyoote diriirsinoonniha ikkanna; handaaru ogeeyye kiiro haammata ikkasenni gatamarshu uduunni islanchimma ledo amadaminohunni raaqama kalaqantannokki gede kaajjado qorqorsha assinannita buuxisino.
Konistiraakshiinete industire kontiraata adhitinnori, amaalaano, waaco shiqishshannori, hattono harunsaano bissa gambooshshenna beeqqaanote amali babbadooshshi noowa ikkasinni harunsote looso mittu dani harinsho ledo kaajjishatenni loonsanni hee’noonnita coyi’rino.
Biilloonyu mootimmate pirojektete jeefishshi ledo amadante noota qara mitiimmubba; balaxote suudi xiinxallote loosi garunni loosama hooga, miinju horaameessimmanna qooxeessu xiiwo garinni jawu qarri, loosiisidhanno bissa ikkado baajeette gaama hooga, gatamarsha harinsanni baatto 3ki anninni keere fultukkinni gatamarshu garafo fushshanna balaxote baatooshshe gumula pirojektuwate goshooshamara korkaata ikkitinota kayse; taashshinanni gede assinoonnita xawisino.
Wole widoonni kontiraakterootu uminsa daafira sodhino taje shiqishanna labbino qarrubba bande qaafo adhinoonniha ikkasinni guma la’nanni dangoonnita kalaa Mebraatu coyi’rino.
Qoqqowoho ijaaru seeri gumulo lainohunni fajjo aate harinsho seeru garinni gumulama hasiissannosetanna dureeyye ijaara gatamadhate suudenna gatamarshu fajjo adhituhu gedensaanni fajjinoonninsa owaante gobbaanni hosiisate akati hee’rannokki gede kaajjado harunso assinanni hee’noonnita egensiisino. Konne seera harunsite loossannokkiri aana seerunna gashshootu qaafo adhinanni yinota Sidaamu qoqqowi quchumu latishshinna konistiraakshiinete biironni fultino mashalaqqe leellishshanno.
Qiddist Gezaheny
Bakkalcho Ella 20, 2016 M.D
