– 1.6 miliyoone ali daga horoonsi`raano ikkitanno
Addis Ababa:- Tayxe hawadi dancha fajjo loosinni 1.6 miliyoone ali daga horoonsi`raano assate hende loonsanni hee’noonnita Sidaamu qoqqowi meentu, wedellunna dagoomittete hajo biiro egensiissu. Qoqqowu deerrinni tayxe hawadi dancha fajjo looso Ella 13, 2016 M.Dnni faajjetenni hananfoonni.
Qoqqowu meentu, wedellunna dagoomittete hajo biiro laynki sooreessinna wedellu handaari sooreessi kalaa Desti Leggesehu Itophiyu pireesete uurrinsha ledo assino hasaawinni xawisanni; tayxe hawadi dancha fajjo loosinni xaphooma 761 kumi ali wedelli beeqqaano ikkitanno.
Tayxe hawadi dancha fajjo loosinni 13 loosu daninni owaante uynanniha ikkanna Gibrinnu loosi, chigginye kaasa, keerunna ga’labbo, rosunna qajeelshu, dhuka ajjinore dagoomu bissa kaa’la, mundee aate owaante, fayyimmate owaante, doogotenna hodhishshu, quchummate doogimaru latishshi, lolahu ha’ranno dichuwa co’eessa gamunni afantanno.
Tenne owaantuwanni fayyimmate agarooshshinna taraabbannokki xisso aana dagoomaho huwanyo kalaqate, busha gawajjanno rosichi aana roso aate, koo-tee kiso gargaratenna seeriweelo qaaqquullu darte uurrisate hattono hawadi xeena harunsite kalaqantara dandiitanno lolahu danonni daga agadhitanno gede roso aate dandiissannore ikkansa huwachishinno.
Xaphooma 1 miliyoone 689 kumi ali daga horoonsi`raano assitanno tenne owaantenni 749 miliyoone 299 kumi ale mootimmate fulo gatisate mixo amandoonnita coyi’ranohu kalaa Leggese; 2 kume ikkitanno dagara haaro mine minatenna haaroonsote looso gumullannita qummeessino.
Hattono 8 miliyoone chigginyuwa kaasate mixo amandoonnita kulannohu handaaru sooreessi; fajjaaleessimmate aana safantino mundee aate owaantennino 3 kume Yunite mundee haa’rate hendoonni yino.
Hawadi dancha fajjo looso qoqqowunni kaynse olluubbate geeshsha rahotenna illete leellanno garinni gumulate hendoonnita kayse; uynanni owaantuwa mereerinni qarunni dhukiweelootanna irko hasidhannore dagoomu bissa kaa’la, hurbaate itisanna konni alba kaasantino chigginyuwara amadooshshenna towanyo assa balaxo uynannire ikkansa huwachishinno.
Hawadi yanna wedellaho baxxinohunni rosaanote fooliishshote yanna ikkitinoti addaho. Tenne yannansa danchummate loosi aana beeqqatenni dagooma kaa’lanna owaata hasiissannota qaagiissannohu kalaa Desti; konninnino aantino ilamara danchumma rosiisa noonke. Ga’a gobbate massagaanonna owaataano hoongeemmokki gede techo danchumma loonsanninna rosiinsanni aantino ilamara lawishsha ikka hasiissanno yaanni sokkasi saysino.
Qiddist Gezzaheny
Bakkalcho Ella 20, 2016 M.D
