Addis Ababa:- Sircho doorantino woraamma tuqishshinna saadate sagale ataachinanni magaaziinna, tekinolojete reekko mereersha maasiinsoonni.
Biiro Aliyye Sidaami zoone Haweeli woradi Ramadi olliira saadate sagale duunnanni magaaziine, tekinolojete reekko mereershshanna Hawaasi gaangaawi woradi Doorete quchumira saadatenna lukkuwu sagale qineesinanni ijaara qoqqowunna zoonete hattono woraddate loosu massagaano afantinowa faajjetenni maassiinse looso hanafisiinsoonni.
Qixxaawote aana afantinoti Sidaamu qoqqowi amaale mini qara songaafitte Dukko Faantaye Kebbedeti coyidhanni; mootimma daga qajeeltanno uurrinshubba halashshitanni nootanna, togoohu saadate sagale qineessinanni darginna saadatenna lukkuwu sagale ijaarii kalaqama daga qooxeessinsanni xeertidhukkinni afi’ra hasiissannonsa horo afidhanno gede dandiisannoha ikkasi buuxissino.
Sidaamu qoqqowi saadate jiro latishshi biiro sooreessi kaala Tekle Jombihu isi widoonni, Biiro Dikkote oolto geisate haamata loossa gumultanni noota qummi asse; sirchonsanna fayyimmansa buunxoonnire doorantino Woraamma mootimmate irkonni hirre baalante zoonnaranna woraddara tuqinsoonnita egensiisino.
57 miliyoone birre fulo assine gatamarroonnihu saadate sagale qineessinannihunna tekinoloojete reekko mereershi wedellaho loosu kaayyo kalaqate qeechisi luphiimaho yino.
Qoqqowu saadate latishshinnino ikko baalante handaarubbanni woyyino guma maareekkisiisanni afamanno yinohu Qoqqowu Jireenyu Paarte Poletikunna dhuku Xaabbanyooti Handaari Sooreessi Kalaa Asfi Gooneessohu; daga saadatenni afidhanno laalcho sagalimmatennino sa’e dikko fushshatenni woxe afidhe heeshshonsa woyeesidhanni noota huwachishinnota Sidaamu Qoqqowi Saadate Jiro Latishshi Biiro fushshitino mashalaqqe leellishshanno.
Gaazeexu Odeessaanchinni
Bakkalcho Ella 20, 2016 M.D
