Addis Ababa:- Oosote dancha gobba ragisiisa baxannohu baalu techo chigginye kaasatenni investe assa noosi yee xaphoomu ministirchi Abiy Ahimed (Dr) xawisi.
Xaphoomu ministirchi Abiy Ahimed (Dr) 2016 M.D haanju harumi amuraati balaxote kaasa lainohunni saysino sokkanni; 2016 M.D haanju harumi amuraati mixonke 40 biliyoone chigginye iillate yiino.
Mixo gumulate konni dirinni 7.5 biliyoone chigginye kaasa agarantannonke yeeno huwachishino.
Dirunniha haanju harumi amuraate “kaassanno gobba; sufissanno ilama” yaanno uminni harinsannita xawisinohu xaphoomu ministirchi; chigginye kaasanna awuuta konni ilama yawooti yee xawisino. Konni kaiminni oosote dancha gobba ragisa baxanno baali chigginye kaasatenni investe assa noosi yiino.
Techo kaanseemmokkihanna awuunteemmokkiha ikkiro noonketi bushshu jiro hoshooshanteennanna adhanteenna qo`la dandiineemmokki deerra iillinammora dandiineemmo yiinohu xaphoomu ministirchi; “muramino haqqichi 10 diri geeshsha noo yanna giddo riqiwamara dandaanno; adhamino bushshi kayinni mittu kumi dirinni diriqiwamanno’ yaatenni bushshu hoshooshama abbitara dandiitanno gawajjo buuxisino.
Diilallote gadi soorro songotenni ikkikkinni angansa diriirsite kaassanno bareeddanni soorrantannota xawisinohu xaphoomu ministirchi; Itophiyu amuraatu hanafi yannanni kayse bununni, atikiltenna laalote guminni hattono wolootta handaarranni guma abbitanni nootano lawishshaho kaysino.
Chigginye kaasa hiittenneno poletiku laooshshinni co`ichaho yiinohu xaphoomu ministirchi; doorshu yannara huuronke kiiro babbaxxitanno. Kaasate yannara kayinni 120 miliyoone daga mittu gede kiirantanno yiino. Konni daafirano baalunku Itophiyu daga beeqqa hasiissanno yaatenni Itophiyu dagara woshshatto shiqishino.
Haanju harumi balaxote fanote amuraati qixxaawonni Itophiyunniti dubbu hala`linyi rippoorte faajje ikkitino. Gobboomunniha haanju harumi amadonna loosu guma shiqishshanno kalqoomu odeessaancho fiilme maassote la“ono harinsoonni.
Faajje assinoonni Itophiyu Dubbu hala`linyi rippoortenni dubbu hala`linyinke 20111 M.D noowiinni 17.2 anga xibbuunni 23.6 anga xibbuunni luphi yinota xawinsoonni.
Xaphoomu ministirchi Abiy Ahimed (Dr) amuraatu aana assino hasaawinni; konne guma sufisiisa hasiissanno gede qummeessinota xaphoomu ministirchi borro mininni afi`noonni mashalaqqe leellishshanno.
Abbebech Maatewoos
Bakkalcho Ella 20, 2016 M.D
