Addis Ababa:- 2016/17 goyirete looso hanafate qixxaawo assinanni hee’noonnita Sidaamu Qoqqowi Irshunna Kalaqamu Jiro Latishshi Biiro egensiissino.
Biiro goyirete laalchira baattote qixxaawo assinanni hee’noonnita buuxissino.
Gaashe, Wahe, Hayixu, Qamadenna qaamattote kaashshi qoqqowoho qarunni goyirete yannara laashshinanni gidu danaati.
Hajote aana Itophiyu Pireesete Uurrinsha ledo bilbilunni hasaawa assinohu Qoqqowu Irshunna Kalaqamu Jiro Latishshi Biiro Irshu handaari sooreessi kalaa Bangu Beqqele coyi’ranni; tayxe goyirete loosi mixo baxxitannota assannori Sidaamu qoqqowi gede 10 diri lophote mixo, xaa yannara iillinoonni deerra, qooxeessu injoo, sai diri jeefishsha kaima assitinotanna maatete Jireenyi jeefishsha xaphi assite amaddinota ikkaseeti yiino.
Qoqqowoho tayxe goyirete yanna loosinni xaphooma 131 kume 562 hektaare baatto addi addi wixinni diwate hende qixxaawo assinanni hee’noonni yiinohu kalaa Bangu; konninni, Weesete gobbaanni 11.6 miliyoone ali kuntaala gide gamba assate mixo amandoonnita buuxisino.
Konni giddonni fiqaaqunna qaamattote gidinni calla 98 kume 641 hektaare baatto latisatenni 3 miliyoone kuntaali ale laalcho gamba assate hendoonni.
Hattono gati mu’ronni 16 kumenna 57 hektaare baatto latinse 3.9 miliyoone kuntaala laalcho gamba assate mixo amandoonni. Rumuddate kaashshinni baxxinohunni Dinnichunna Maxaaxeessunni 16 kume 864 hektaare baatto latinse 4.7 Miliyoone kuntaala laalcho gamba assate mixo amande hasiissanno qixxaawo assinanni hee’noonnita egensiisino.
Sa’u badheessu yannara xaphooma 112 kume 200 hektaare ali baatto addi addi wixinni diwatenni 14.5 Miliyoone kuntaala gide gamba assate hende loonsanni keeshshinoonnita kayisinohu kalaa Bangu; xaa yannara iillino laalcho gamba assinanni yanna ikka hooggurono hendoonni garinni gumullanni yitanno hexxo noota qummeessino.
Konni giddonni 63 kume 239 hektaare ali baatto badalatenni calla dimboonnite giddonni 12 kume haktaare aana badalate da’muulla ubbinoha ikkanna; dagate ledo halamme budillaancho doogonninna kemikaale kiifatenni gargara dandiinoonnita sooreessu lede kayisino.
Gibrinnu sagalete, miinjunna loosu kaayyo hajaati yiinohu kalaa Bangu; daga halante gidu aana ubbino da’muulla woro woroonni hunate jirsa kara hasiissannonsa yiino.
Ledoteno Yuuriya garunni yannatenni woranna aantete goyirete loosira baatto yannatenni qixxeessatenni yannate ledo loosa hasiissanno yaanni sokkasi sayisino.
Qoqqowoho tayxe goyirete yanna looso Maaja 1/2016M.D hananfannitano lede qummeessino.
Qiddist Gezzaheny
Bakkalcho Ella 13, 2016 M.D
