Addis Ababa:- Qooxeessaho loosu kaayyonna Industirete hasatto kaima assatenni ikkaddanna heewisamaano qansoota qajeelsitanni noota Hawaasi Poolitekinikete Kolleejje egensiissu.
Hawaasi Poolitekinikete kolleejje Diine ikkinohu kalaa Melkaamu Baraasa Itophiyu pireesete uurrinshara xawisino garinni; loosu ogimmatenni massagama noosi yaannohunni looso ikkadimmatenni kalaqanna heewisama dandiitanno qansoota kalaqate illachiinshe qajeelsinanni hee’noonni.
Kolleejje sa’u 26 dirrara babbaxxitino ogimmate handaarranni qajeelsitanni keeshshitinota qaagiissinohu kalaa Melkaamu; xaa geeshsha 159 kume ikkitanno qansooti harancho yannanna uurrinshunni ogimmatenna hayyote qajeelsha adhitinota kaysino.
Xaa yannara gobboomu deerrinni loosu ogimmatenni massagama hasiissanno yine worroonni faasho kaiminni qajeelaano uminsanni looso kalaqa dandiitanno garinni tiro uyne loonsanni hee’noonni yiino.
Konni kaiminnino, qooxeessaho loosu kaayyo kalaqonna Industirete handaari hasattora ikkadimmatenni beeqqanna uminsanni looso kalaqa dandiitanno garinni qajeelsha qajeelsinanni hee’noonnita qummeessino.
Kolleejje xaa yannara 22 babbaxxitino ogimmate handaarranni qooxeessaho loosu kaayyo kalaqate injoonna dikkote xiinxallo kaima assatenni hattono Industirete ledo xaadooshshu noonsare badatenni qansootaho qajeelsha uynanni hee’noonni.
Qajeelshubba kaima assitannohu umihunni, uurrinshunni uynanni qajeelsha ikkanna; wolu garinni hashshi yannanna fooliishshote yanna qajeelsha ikkanna konni dirinnino 4 kumenna 68 qajeelaano babbaxxitino ogimmate handaarranni harunsitanni afantannota qummeessino.
Baxxinohunni, loosu kaayyo kalaqo ledo xaaddanno handaarrannino konni dirinni 14 kumenna 300 ikkanno harammaadda yanna qajeelsha aate mixi’ne xaa geeshsha 11 kume harammaadda yanna qajeelshubba aate dandiinoonnita Kolleejjete Diinichi egensiisino.
Tenne yannara looso hasidhannore ikkitukkinni looso kalaqqanno qansoota qajeelsara Federaalete deerrinnino faasho worroonnita kulinohu kalaa Melkaamu; Kolleejjeno noose qajeelshu mereershubbanni qansootu ikkaddanna uminsanni looso kalaqa dandiitanno garinni qajeelsitanni afantanno yiino.
Hawaasi Poolitekinikete Kolleejje tekinolojete kalaqonnino gobboomu deerrinni heewisamaanchonna afansha afidhinota ikkasenni; tekinolojete kalaqonna reekkonni qooxeessaho calla ikkikkinni gobbate giddo babbaxxitino qooxeessubbarano Industirete hasattora waaco ikkannore laashshate illachishshinota kulloonni.
Xaa geeshshano 93 ikkitanno Industirranni ledo xaadooshshe kalaqatenni xibbuunni 70% loosunni leellinshanni qajeelshinni hattono 30% egennotenni bilchaata
Amsaalu Felleqe
Bakkalcho Ella 13, 2016 M.D
