Addis Ababa:- 2016/17 goyrete laalchi saninni ellu agani umi lamala geeshsha 20 miliyoone hekitaare ale baatto hawuurrannita gibrinnu ministere egensiissu. 12 miliyoone hekitaare ale baatto qasiisotenni latisateno loonsanni hee`noonni. Gibrinnu ministerenni gidu latishshi massago loosi gumulsiisaanchi kalaa Isayyaas Lemmihu Itophiyu pireesete uurrinshara xawisino garinni; xaa geeshsha budillaanchonna yannaasincho tekinoloojubbanni horoonsi`ratenni 14 miliyoone hekitaare ikkitanno baatto hawuurroonni.
Hawuurroonni baatto giddonni 3.5 miliyoone hekitaare meddi yitanno baatto wixunni diwantino yiinohu kalaa Isayyaasi; wixunni diwantino baatto giddonni qole 2 miliyoone 69 kume 153 hekitaare qasiisotenni lattinota ikkaseno xawisino.
Xaphoomunni 2016/17 goyrete laalchi saninni 12 miliyoone 12 miliyoone 125 kume ale hekitaare baatto qasiisote irshinni lattannota huwachishino.
Tayxe gayrete laalchi saninni qasiisotenninna uurrinshunni diwantanno 20 miliyoone 403 kume 245 hekitaare baatto giddonni 12 miliyoone hekitaare baatto ale kilaasteretenni hawuuratenni 615 miliyoone 921 kume ale kuntaala laalcho agarrannitano buuxisino.
Badheessu irshi millimillo looso lainohunni 2016/17 laalchu saninni badheessu ciirsaano ikkitino Amaaru, Oromiyu, Tigrayete, Sidaamu, Wodiidi Itophiy, Mereerimu Itophiy, Wodiidi Galchiminna Sumaalete qoqqowubbara 3 miliyoone 123 kume 797 hekitaare baatto latisatenni 81 kume 852 kume ale kuntaala laalcho afirate mixi`noonnita egensiisino.
Kalaa Isayyaas xawisino garinni; xaa geeshsha badheessunni 3 miliyoone 559 kume 152 hekitaare baatto hawuurre 3 miliyoone 518 kume 431 hekitaare baatto wixunni dimboonnita huwachishino. Wixunni dimboonni baatto giddonni honse gidubbanni 1 miliyoone 96 kume 312 hekitaare baatto qasiisotenni dimboonniha ikkanna; Tigrayete qoqqowira 14 kume 827 hekitaare baatto gamba assine 143 kume 461 kuntaala laalcho afi`noonnita coyi`rino.
Sa“i goyirete irsha xaphooma hawuurate mixi`noonnihu 16 miliyoone hekitaare baatto ikkanna konni giddonni 8.5 miliyoone hekitaare baatto qasiisotenni diwate mixi`noonnitano mashalaqqubba leellishshanno.
Abbebech Maatewoos
Bakkalcho Ella 13, 2016 M.D
