Addis Ababa:- Abbayi kofatto ijaarsha gudate gattino loossa gumulanta geeshsha tuqu xaadooshshuwa agarranninsa qeecha fula noonsata Bayi’riidi haaroo’mate kofatto qineesso pirojekte borro mini xa’mino.
Borrote mini Abbayi kofatto ijaarshi loossa lainohunni tuqu xaadooshshuwa sooreeyyenna ogeeyye ledo tenne lamalara hasaawa assino.
Qineessote borro minihu qaru dayrekterichi Aregaawi Berihe (Dr.) tenne yannara xawisanni; kofattote ijaarshi looso gudate assinanni wo’naalshira tuqu xaadooshshuwa qeechi luphiima ikkasinni qeechansa kaajjishshe sufisiisa noonsa yiino.
Tuqu xaadooshshuwa kofattote ijaarshi loosamanni keeshshi yannara fultanni keeshshitino qeechi naandanniha ikkasino qummeessino.
Abbayi kofatto Itophiyu miinju wolapho buuxisiisannoha ikaksi kule; qansootu buximatenni fultannonna lopho buuxisiisate ragaanni tuqu xaadooshshuwa kofattote dhaggenna ijaarshu harinsho maareekka noonsata huwachishino.
Kofatto qansootaho uytanno horo kalqoomu dagoomirano faajjetenni leellishanna egensiisa agarrannitano hattonni.
Kofattote ijaarshi loosi xaa yannara xibbuunni 96% iillinoha ikkanna gatino loossa aantino yannara gumulate dandiisiisannoha woxe gamba assate looso loonsanni hee’noonnita kulloonni. Aantino yannara 11 Terbayne loosu giddora eessate 45 biliyoone birri hasiisannotano xawinsoonni.
Abbayi kofatto sa’u 13 dirrara dagoomu beeqqonni ijaarranni keeshshinoonnihanna kaajjado dipilomaase hasiisanno looso ikkasi kule; konnira, tuqu xaadooshshuwa agarranninsa qeecha fula hasiissannota xawinsoonni.
Gaazeexu Odeessaanchinni
Bakkalcho Ella 13, 2016 M.D
