Addis Ababa:- Qoqqowoho sirchonsa woyyeessinoonni saadanni diru giddo 300 miliyoone litire ale Adote laalcho afi’ra dandiinoonnita Sidaamu qoqqowi Saadate Jiro Latishshi Biiro egensiissu.
Biirote Layinki Sooreessinna Saadate Fayyimmanna Waaco Handaari Sooreessi Dokter Miliyoon Yote Itophiyu pireesete uurrinshare xawisanni; qoqqowu saadate jironni egennaminoha ikkanna; 2.8 miliyoone ale gombillu saada afantannota coyi’rino.
Kuri giddonni 14% ale ikkitanno saada sirchonsa woyyeessinoonnire ikkansa buuxisino.
Ruukkado baatto aana saada ceatenni hala’lado laalcho afi’ra dandiinannita hedote giddo woratenni qoqqowoho xaa yannara saadate ceatto loossa woyyeessate illachiinshe loonsanni hee’noonnitano egensiisino.
Sooreessu, dokter Miliyooni xawishshi garinni; sai 2014M.D hanafe qoqqowoho saadate sircho woyyeessatenna handaarunni afi’nanni laalchimma lossate ragaanni addi illacha tunge loonsanni hee’noonnita kaysino.
Konninni, saadate sircho woyyeessatenni Adote laalcho lossate hala’lado looso loonsanni hee’noonniha ikkanna; qoqqowoho xaa yannara sirchonsa woyyeessinoonni saadanni diru giddo 300 miliyoone litire ale Adote laalcho afi’ra dandiinoonni yiino.
Afi’nanni laalchinni xibbuunni 60% ikkitannota dikkote shiqinshanniha ikkanna; 40% kayinni mini giddo horoonsi’nannita buuxisino.
Qooxeessu dagoomi sirchonsa woyyeessinoonni saada ceatenni Adote laalcho mini giddo horoonsi’ratenni sae dikkote shiqishatenni horaameeyye ikkanni afamannota kayse; adote laalcho hallanyunni ikko maamarunni hala’ladunni dikkote shiqishate harinsho sufino garinni kaajjishateno Biiro agarranni irko assitannota Sooreessu lede buuxisino.
Amsaalu Felleqe
Bakkalcho Ella 13, 2016 M.D
