Addis Ababa:- Itophiyu gobbate giddo afantanno qara qara shiilubba wolqate doorshira hosiisatenni kaarbenete akkimalimma ajishate loossanni noota shiilote ministere egensiissu.
Shiilote ministere deeti kalaa Miliyoon Maatiwoosihu Itophiyu pireesete uurrinshara xawisino garinni; Itophiyu shiilote handaara wolqate doorshira horoonsi`ratenni kaarbenete akkimalimma ajishate loossanni agantanno.
Koppere, Nikeele, Kobaalti, Litiyeeme hattono wolootta wuddenna wolqate doorshira ikkitanno shiilote dani Itophiyu giddo afantannore ikkansa daafira babbaxxitino doogganni buunxoonnita coyi`rinohu kalaa Miliyooni, kunino gobba kalqoomu deerrinni yaachishanno akati aana iillinoha kaarbenete akkimalimma ajishate jawiidi qeecha adhitanno gede dandiisannose yee xawisino.
Afrikaho afantanno shiilubba wolqate doorshira horoonsi`ra illacha xuruurtanni no. kunino kaarbenete akkimalimma ajishate ragaanni luphiima horo noosihono yiino kalaa Miliyooni.
Ledotennino miinju ragaanni shiilote handaari aantete gobbate latishsha murtanno handaarra mereerinni mitto ikkanno gede dandiisanno yee huwachishino.
Kalaa Miliyooni xawishshi garinni; baxxinohunni Itophiyu kaarbenete akkimalimmara reqecceessitanno latishshu loossa giddonni fulatenni haanja industire giddora ease aantete heedhanno loossara injaanno akata kalaqannoho. Mitte gobba latishshira wolqa qara ikkasenni babbaxxitino shiilubba latisa hasiissanno.
Shiilote latishshi ragi kaarbenete akkimalimma ajishate aana kaima assinoho yiinohu ministir deetu; handaarunni noo eltubba sufotenni horoonsi`ra balaxo uynanni coye ikkinota huwachishino.
Shiilote latishshira qoteho kalaqamu gaazenna jio-termaalete wolqa babbaxxitino wolqate doorshira latisate mootimma hallanyu handaari ledo loossanni afantannono yiino.
Itophiyu Konne lawino latishshu raga harunsa hanaffunkunni sase diro kiirsiissino yiinoha ikkanna; hasi`nanni shiilubba Itophiyaho afantannore ikkansanni konni handaarinni gumaamo ikkate luphiima kaayyo nootano huwachishino.
Kalaa Miliyoon yiino garinni; Itophiyu Afrikaho shiilote handaari aana loossanno handaaru latisaano ledo halamatenni loosate hasatto noose. Shiilote latisaano kayissanno hajubba aana malamatenni gobbate horo ayirrisiisanno garinni loosu widira e`nanni gede illacha uyne loonsanni hee`noonni.
Abbebech Maatewoos
Bakkalcho Ella 13, 2016 M.D
