Addis Ababa:- Danchummate fajjo owaante qansootu yannansa, woxensa, ogimmansanna egennonsa gobbansa lophora baattanno assoote ikkasi Layinki Xaphoomu ministirchi Temesgen Xiruneh coyi’ri.
Tayxe 2016M.D hawadi yanna gobboomu danchummate fajjo owaante hanafisiisate millimillote bare Adiwu qaaggooshshi muuziyeemera bero harinsoonni.
Barete leelle hasaawa assinohu Layinki Xaphoomu ministirchi Temesgen Xirunehi tenne yannara coyi’ranni; baajeetenna qajeelstino mannu wolqa ajje leeltanno gobbara dagoomu qarrubba tirate danchummate fajjo owaante lowontanni hasiissanno yiino.
Danchummate fajjo owaante qansootu woxensa, egennonsa, ogimmansanna yannansa gobbansa lophora baattanno waa ikkasino huwachishino.
Tayxehu hawadi yanna dancha fajjo owaante “Danchummanna mittimma Itophiyu lophora” yaanno adawarshinni harinsannita millimillote barera xawinsoonniha ikkanna; IFDR Meentunna dagoomitte hajubba ministere, Rosu ministere hattono Keeru ministere qinaabbe qixxeessitinota kulloonni.
Tayxe hawadi yanna danchummate fajjo owaante loosinni 34 miliyoone ale ikkitanno qansooti beeqqitannotanna 49 miliyoone ali dagoomu bissa horaameeyye ikkitannota xawinsoonni.
Hawadi yannara harinsanni danchummate loossa woxu widira soorriniro 26 biliyoone ale birra ikkannotano kulloonni.
Danchummate fajjo owaante millimillo agarranni bikkinni gumulantanno gede dandiisiissanno mixo qixxaabbinoha ikkanna; mixote garinni babbaxxitino owaantubba dagoomaho uynanni yinoonni. Millimillo kaajjado gobboomitte mittimma kalaqqannoha ikkanna; jiroo’mitino Itophiya ijaarate luphiimu deerrinni irko assitannotano xawinsoonni.
Millimillote barera Layinki Xaphoomu ministircha lede woloottu ministirooti, qoqqowubbate massagaano,amma’note massagaano, dancha fajjo owaante uytannori hattono ayirrado woshshatto assinoonninsa wosinna beeqqitino.
Amsaalu Felleqe
Bakkalcho Ella 13, 2016 M.D
