Addis Ababa:- Quchumaho tayxe dirinni 13 kumi ali qansootira loosu kaayyo kalanqoonnita Hawaasi quchumi loosu, loosiisaanotenna loosaasinete biddishshi egensiisi.
Biddishshu sooreessi kalaa Taariku Xilahun Itophiyu pireesete uurrinshara xawisino garinni konni dirinni qansootaho loosu kaayyo kalaqate ragaanni xaa geeshsha addi illacha tunge loonsanni hee’noonni.
Quchumu akatisinni, qansootu babbaxxitino qooxeessubbanni bobbakkannnowa ikkasinni looso hoogginori kiiro haammattannokki garinni loonsannitano buuxisino.
Tayxe dirinnino xaa geeshsha 13 kume 500 ikkitanno qansooti babbaxxitino handaarranni loosu kaayyo horaameeyye assinoonnitano kalaa Taariku buuxisino.
Konni albaanni Interpirayzetenni tantanante loosidhanni keeshshiturono, yinoonni yanna gedensaanni wolootta haaru garinni tantanantanno wedellira sayissukkinni seeda dirrara horoonsidhanni keeshshitinore 1 kume 575 sheede bandoonniri giddonni 1kumenna 175 sheede qolsiinsoonni yiino.
Kuri giddonni 951 ikkitanno sheede mootimmate kaazinira qolsiinsoonnite giddonni kayinni 388 sheede haaru garinni tantanantino Interpirayzootira sayinsoonnita egensiisino.
Interpirayzete su’minni hallanyootunni amadante seeda yannara keeshshitinota 20.1 hektaare baattono qolsiisa dandiinoonnita kaysinohu Biddishahu sooreessi; 400 miliyoone ale birrano hafanfarinoha qolsiinsoommo yiino.
Sooreessu xawishshi garinni; amandoonni baajeettete dirinni xaa geeshsha 100 Interpirayzootira laalchonsa dikkote shiqishshanno sheede injaaroonni. Kuri giddonni 60 ikkitannota maamarrate sayinsoonniha ikkanna gattinota aantino yannara sayinsanni.
Babbaxxitino loosu kalaqo handaarranni bobbakkinorira 31.9 miliyoone birra liqiissate mixi’ne xaa geeshsha 25.3 miliyoone birra liqoote kaayyo kalanqoonniha ikkanna; 20.3 miliyoone birra kayinni konni albaanni liqiissinoonniha qolsiisa dandiinoonnitano hattonni.
Quchumu gashshooti loosu kaayyo kalaqonni woloottaho lawishsha ikkanno garinni illacha tungoonni yiinohu Biddishshu sooreessi; qansootu gobbate giddo calla ikkikkinni babbaxxitino yannara qajeelsha adhatenni Baarawido hadhe loosu hiraameeyye ikkitanno garinni haja la’annonaa bissanni ledo qinaanbe loonsanni hee’noonnitano kaysino.
Bakkalcho Ella 6, 2016 M.D
