– 72 kumi ali rosaano Tayxe sette kifile qoqqowu fonqolo adhitino
2016 rosu diri 12 kifile gobboomu fonqolo aate hasiissanno qixxaawo assinanni hee’noonnita Sidaamu qoqqowi rosu biiro egeniissu. Fonqolo woraqatunninna onlayinetenni uyinannitano biiro ledde buuxissino.
Sidaamu qoqqowi rosu biiro layinki sooreessinna rosate, rosiisatenna keenote handaari sooreessi kalaa Taaffese Gebremaariyaamihu Itophiyu pireesete uurrinshara xawisanni; tayxe 12 kifile gobboomu fonqolo lainohunni hasiissanno qixxaawo assinanni hee’noonni. Kifilete rosi hafanfarannokki gede assatenni, guwurshu roso uyinanni hee’noonnita kulino.
Hattono akeekishshu fonqolo sai Dotteessa 12 nni kayinse Onkoleessa 1,2016 M.D geeshsha uyinoonnita coyi’re kunino fonqolamaano roorenkanni umonsa qixxeessitannonna keentanno gede dandiisannoha ikkasi buuxisino.
Sa’u lame lamala albaanni qixxaawonke kifile widoonni kiirote so’ro kalaqantinota qixxaawonke kifile ammante sao xa’midhanni;qoqqowoho xaphooma 40 kumi 914 rosaano tayxe 12 kifile gobboomu fonqolo adhate maareekkantinota sooreessu buuxisasi huwattinankerano qaagiissineemmo.
Fonqolo adhate qixxaabbinori; uurrinshu rosi, hashshi qixxaawonna hallanyu fonqolamaano ikkansa huwachishinnokalaa Taaffese qummeessino.
Qoqqowoho tayxe 12 kifile gobboomu fonqolo lamu garinni uyinanniha ikkanna; woraqatunna teknoloojete woyi Onlayinete hayyonni ikkinota qummeessinohu kalaa Taaffese; qoqqowoho roore anga rosaano woraqatunni fonqolantannotanna Yirgaalametenna Hawaasi quchumira calla Teknoloojetenni uyinannita egensiisino.
Onilayinetenni baalaho aate jifo ikkinore xawisanni,noo jiro ikkado ikkitinokkita Kompiwuterete anje hee’rase qummeessino. Onlayinete fonqolamaano Hawaasi Yuniversitera fonqolantannota kayisannohu handaaru sooreessi; konnirano rosaano teknoloojetenni fonqolo adhinanni hayyo rossanni afantannota lede xawisino.
Konni daafira fonqolamaano gattinonsa yannanni assa hasiissannosa qixxaawo assitanno gede baxxinohunni tiiunni qixxaabbanno gede huwachishinno. Fonqolu baxxinoricho ikkinokkita, rosu amuraati giddonni mitto ikkinotanna fonqolu giddoonni sa’’a hasiissannonsata ammante waajjanna bidhata hasiissannonsakkita huwachishinno. Hattono gumansa ajishanno akati giddora e’annokki gede kalaa Taaffese sokkasi sayisino.
Amadantino odoonni qoqqowoho sette kifile qoqqowu fonqolo sa’u sase barrubbara uyinanni keeshshinoonniha ikkanna; 793 fonqolu mereershuwara xaphooma 72 kumi 162 rosaano fonqoloho ofoltinore ikkansa qoqqowu rosu biiro dagate xaadooshshi dayirektoreete dayirektercho dukko Tseggaanesh Hagoositi uurrinshankera xawissino.
Ledotenni 6 kifile qoqqowu fonqolo Ella 12 hananfe 13/ 6,,2016 M.D geeshsha uyinannita dayirektercho ledde buuxissino.
Qiddist Gezzaheny
Bakkalcho Ella 6, 2016 M.D
