Addis Ababa:- Gorsu loosira jawa illacha tugatenni laalchonna laalchimma lossatenna hegeraame lopho buuxisiisate loonsanni hee’noonnita Sidaamu qoqqowi pirezidaantichi Desta Ledamo coyi’ri.
Pirezidaatichu Desta, sa’u lame barrubbara qoqqowoho duuchu handaarinni loosantinota latishshu loossa qoqqowu jajjabba loosu massagaanonni ledo ikkatenni towaanyo assino.
Pirezidaantichu qoqqowoho baadiyyetenna quchummate loonsoonnita latishahu loossa towaanyo assi yannara coyi’rino garinni; baxxinohunni baadiyyete qooxeessubbara gorsu loosinni, badheessunna goyirete yanna loossanni laalchonna laalchimma lossate jawa illacha tungoonni yiino.
Yannitte gibrinnu hayyo garunni loosu aana hosiisanna laalchimma lossa qara hajooti yiinohu pirezidaantichu; konnirano gorsu latishshi jawa qeecha amadannohura qoqqowoho diru dirunkunni 300 miliyoone ale birra gaammanni gorsu latishsha halashshinanni hee’noonnita qummeessino.
Baxxinihunni, xeenu anje noo qooxeessubbara afi’noonnita way injoo garunni horoonsi’ne laalchimma lossi’ra yanna uynannikki hajo ikkase kayse; gorsunni manaadda mereerimanna jajjabba gorsu pirojektubba ijaaratenni dagoomunniha gibrinnu laalchimma lossanna hegeraame lopho buuxisiisa agarrannita huwachishino.
Yannitte gibrinnu hayyo garunni loosu aana hosiisatenni laalchimma lossi’ra, sagaletenni meessaneete dandaa, ledotenni jiro kalaqanna dikkote oolto ga’labbisate loosi qoqqowu illacha tugino haja ikkasino xawisino.
Baxxinohunni, tayxe badheessu yanna loosinni 65 kume hektaare baatto Badalate wixinni diwantinota kule; 1 hekitaarenni 50 kuntaala badalate laalcho afi’rate mixi’ne loonsanni hee’noonnita buuxisino.
Pirezidaantichunna ledosi millisse towaanyo assitinori qoqqowunniri jajjabba looso sooreeyye qoqqowoho quchummate loonsanni hee’noonnita giddo doogga, buussa, way pirojektubba, rosu minnanna fayyimmate uurrinshubba, du’namaanchu haranno booe, maatete Jireenyi loossanna wedellu babbaxxitino Interpirayzetenni loossa handaarranni tantanante laashshidhannore towaanyo assino.
Baadiyyeteno xaa yannara badheessu yanna loossa noo deerra la’noha ikkanna; baxxinohunni gorsunni lattino qooxeessubbanna gorsu pirojekte halashshate loossano la”atenni jawaachishinoha ikanna aantetenni illachunni loosa hasiissanno faashono worino.
Yaareed Geetaachew
Bakkalcho Ella 6, 2016 M.D
