Addis Ababa:- Itophiyu sa`u 10 aganna giddo 3.2 biliyoone doolaare ale gobbayidi dhaaddote investimente goshoosha dandiitinota xawinsi.
Baajeettete dirinni goofimarchu 100 barri gumulsha xaphoomu ministirchi Abiy Ahimed (D/r) afaminowa tenne lamala giddo maakisanyote barra harinsoonni.
Xaphoomu ministirchi tuqu xaadi qooli aana tayxehu baajeetete diri jeefasira albaanni goofimarchunniha ikkino ministirootu amaale mini 100 barri keeno hanafinota egensiisino.
“Bashshonte gede sekiterubbate gumulsha keenneemmo; foonqubba buunxeemmo; kaajjillu aana aantete loossara ka`neemmo” yee sokkasi worino.
Pilaanetenna latishshu ministircho Fitsum aseffa (D/r) barete aana sau 100 barrubbanna layinki gobba giddo miinji gumulsha hattono 2017 baajeetete diri illachu ragubba aana ripoorte shiqishshino.
Sau tonne aganna giddo qara qara maakiro ikonomete handaarranni borreessinoonni seyoo 7.9 anga xibbuunni lopho borreessinannita leellishshannota ikkase buuxissino.
Konninnino sau tonne aganna giddo 3.2 biliyoone doolaare gobbayidi dhaaddo investimente goshoosha dandiinoonnita coyidhino. Kunino sau niri togoo yanna ledo heewisiinsanni woyte 14.3 anga xibbuunni roorre nooseta kayissino.
Ledotennino mootimma 425 biliyoone birra eo gamba assitinota xawisse; konni giddonnino 271 biliyoone birra gobba giddo eonni gamba assinoonnite yitino.
Shaqaxu gobbayidi daddalinni 2.9 biliyoone doolaare afinoonnita huwachishshe; ledotennino remitaansetenni 4.2 biliyoone doolaare afantinota coyidhino.
Ministircho egensiissino garinni; mootimmate baajeettete xeneno sa“i niri togoo yanna ledo heewisiinsanni woyte 14 anga xibbuunni ajjino. Kulloonni aganna giddo 2.5 miliyoone qansootira gobbate giddo hattono 300 kume ale ikkitannorira qole gobbayidi gobbuwara loosu kaayyo kalaqantinota xawissino.
Xaphooma qara qara maakiro ikonomete buuxisaanonni borreessinoonni seyoo Itophiyu 7.9 anga xibbuunni lopho borreessiissannota buuxissannore ikkansa huwachishshino.
Abbebech Maatewoos
Bakkalcho Ella 6, 2016 M.D
