Hawaasi quchumi biinfille konni aleenni gotti assate shiqinohanna deerrasi agadhino suude gumulate uurrinshuwa sumuu yitinno.
Quchumu kantiibi kalaa Mekuriyi Mershaye tenne yannara coyi’ranni, quchumaho gumullanni latishshu loossa aana beeqqitanno uurrinshuwa calla ikkitukkinni; hallanyu geeshsha gumulatenni qeechansa fultanno gede xa’mino.
Quchumu gashshootinni calla gumullanni latishshi hee’rannokkita coyi’rannohu kantiibu Mekuriya “latishshaho ka’noommo; hale ikkitanno dagano afi’noommo” yaatenni xaa geeshsha beeqqotenni gumulantino loossara afansha uyino.
Hawaasi quchumi jireenyu paarte sinu borro mini sooreessi kalaa Biruk Selemoonihu coyi’ranni, quchumu deerrasi agadhe hasi’nanni garinni albaage qaafanno gede latishshu loossa ayidde ikkite sufisiisa agarantannonsa yiino.
Hawaasi quchumi quchumu latishshinna konistiraakshiinete biddishshi sooreessi Injiner Mihiretu Gebirehu isi widoonni, dagoomu beeqqonni luphiima qeecha fultanno pirojektuwa quchumu giddo loonsanni hee’noonnita xawisino.
Suude konni alba loonsoonnita xawise, co’ichu Itophiyi millimillonni hanafe woyyeessine shiqinshoonnitanna xawinsoonni basera afantannori mootimmannita ikkitinokki uurrinshuwa latisate sumuu yitinnota xawisino.
DMC ni Taaboori Seeraamikete ijaari geeshsha qaccete afamanno hoccootu ijaari, Hawaasi Yuniversite, Industirete paarke albaanni seesiisate (Landscape) te looso loonsanniha ikkanno.
Barete aana afantino uurrinshuwa quchumu latishshu loosi aana beeqqate fajjaaleeyye ikkansa xawissino.
‘Bired Konselts’ yaamantinoti amaalaancho uurrinshano suude (dizayine) shiqishsheenna hasaawa assinoonni.
Xaa yannara Hawaasa biifisatenna co’eessate “Co’itte Hawaasa” woshshatto faajje assinni. Konni garinni Hawaasa gobbankera afantanno quchummanni biinfillunna co’ichimmate lawishsha ikkase sufisate baalunku qeechasi fulanno gede quchumu gashshooti woshshatto assinoha ikkanna;”ጽዱ ሀዋሳ” pirogiraame baankete suuqo dafitari kiiro:- -Sidaamu baankera 3430302000054
Daddalu baankenni 1000631326572 horoonsi’ratenni baalinke qeechanke fula hasiissannotano xawinsoonn.
Gaazeexu Odeessaanchinni
Bakkalcho Onkoleessa 29, 2016 M.D
