Addis Ababa:- Tayixe haanju harumi amuraatinni laalote chigginye sayinsitte hayyo agartino doogonni qasiisotenni kaasate qixxaawo assinanni hee`noonnita gibirinnu ministere xawissu.
Laalote chigginye kaashsho sayinsitte hayyo agarino garinni qasiisotenni kaansanni gede dandiisate maltanno bare Adaamu quchumira harinsoonni.
Gibirinnu ministerenni haanju harumi amuraati gobboomitte qineessaanote komite borreessaanchi kalaa Faanoose Mekkonnin xawisino garinni; tayxe haanju harumi amuraatinni laalotenna duucha horo noonsa haqquwara illacha uyinoonni.
Barete illachino laalo lede duucha horo noonsa haqquwa qinaawino garinni qasiisotenni kaasate hasiissanno qixxaawo xaanni hanafe assateeti yiino.
Tayxe chigginyete kaashshi amuraatira babbaxxitino owaante uytanno chigginyuwa qixxaawo assinanni hee`noonnita buuxise; chigginyete kaashsho baxxinohunni Abbay lagi qooxeessira illacha assine gumullannitano coyi`rino.
Ledoteno baalante lagubbara qooxeessu akata hedote giddo worino garinni chigginyuwa kaasantanno yiino.
Lawino garinni quchummate qooxeessira biinfillunna laalote chigginyuwa illachunni kaasantannota egensiisino.
Ministerete hortikaalcherete massago loosi gumulsiisaanchi kalaa Abidella Negaash isi widoonni; laalotenna laalchimma lossate sirsinanni chigginyuwa kaashshi sayinsitte amadonsa agara hasiissanno yiino.
Dikko kaima assine qasiisote hayyonni latishsha gumulatenni industirete waaco hasatto wonshate dandiissanno mixo amande loonsanni hee`noonnitano coyi`rino.
Konninnino chigginyenni hanafe balete qixxaawo baxxino garinni gumulantanno gede hasiissanno egennonna dandoo cu`mishiishate qixxeessinoonni bare ikkitinota xawisino.
Sagalimmate owaantera hossanno laalote sirchubba baxxinohunni avokaado, teemire, muuze, paapaaya, maangonna wolootta chigginyuwa qasiisotenni latisate qixxaawo assinanni hee`noonni yiino.
Tayxe haanju harumi amuraati qixxaawonni woyyitino gumulo noota buuxisinohu qole Itophiyu dubbu latishshi inistitiyute haanju harumi latishshinna mannunni loosamino dubbi massago loosi gumulsiisaanchi kalaa Abberu Xennawuho.
Chigginyuwa mudhanno gede balete qixxaawo qaru qeechi nooseta buuxise xaa geeshsha balete qixxaawo woyyitinote yiino.
Dubbu, biinfillunna laalote chigginyuwa kaansanni base uytanno owaantubbanna diilallote akati garinni bande basete widira hodhitanno gedeno xaanni hanafe illacha aa hasiissannota huwachishino.
Abbebech Maatewoos
Bakkalcho Onkoleessa 29, 2016 M.D
