Addis Ababa;- Sidaamu qoqqowira wolqate handaara halashshatenni 263 kume ale daga horaameeyye assa dandiinoonnita Qoqqowu Way, Shiilotenna Wolqate Biiro egensiissu.
Itophiyu pireesete uurrinshara xawisino garinni; qoqqowoho caabbichu wolqa iillitinokkiwa xaa yannara 263 kumenna 955 daga doorshu wolqa horaameeyye assa dandiinoonni.
Caabbichu safote latishshi hala’linokkiwa dagoomaho doorshu wolqa ikkitinota soolaare iillinshanni hee’noonnita kulinohu Biirote sooreessi; konne calla ikkikkinni ummoonni qile balenni fulannoha xalala anganni waa goshooshateno doorshu wolqa horoonsi’nanni hee’noonnita qummeessino.
Amadisiiseno, lamala baadiyyete quchumma soolaarete wolqa horoonsi’raano assate loonsanni hee’noonnitano hattonni.
Mootimma xaa yannara dagate hasiisannore wonshate qaale e’annoha calla ikkikkinni mixidhe gumultanni nooha ikkanna gumulsiisate shukano lossidhanni afantanno yiino.
Biiro xalala anganni way halashsho lainohunni illacha tugge loossanni no yiinohu Sooreessu; Sa’u sase dirrara albaanni qoqqowoho xalalu anganni way iillo 38% noowinni xaa yannara lossatenni baadiyyete xibbuunni 54.2% hattono quchumaho 60% iillisha dandiinoonniha ikkanna; mereerimunni 55.33% widira lossa dandiinoonnita qummeessino.
Amandoonni baajeettete dirinni ijaarate mixi’noonniri 12 xalalu anganni way pirojektubba mereerinni lamala pirojektubba mereerinni roore anga ikkitannori loosi goofinoha ikkanna baalanti maassante dagoomaho horo uytanno gede assinannitano xawisino.
Gaazeexu Odeessaanchinni
Bakkalcho Onkoleessa 29, 2016 M.D
