– Addis Ababu Quchumira hasaawu hedo gamba assate amaalete gafa jeeffino
Addis Ababa:- Amaalammanni hasaawu hedubba gamba assa dandaanke amaalete harinshonni baco doogo hodhisiissannonke yee gobboomu amaalamme komishiine qaru komishiinerichi Mesfin Ariaya (p/r) coyi`ri. Addis Ababaho hasaawu hedo gamba assate amaalete gafa tenne lamala giddo maakisanyote barra jeeffino.
Gobboomu amaalammete komishiine qaru komishiinerichi Mesfin Ariaya (P/r) lamala barrubbara keeshshitinoti Addis Ababu amaallanni hedo gamba assinanni bare danchu garinni jeeffinota lainohunni odeessaancho xawishsha uyno.
Yannate qaranna gobboomunnita ikkitino hajubba aana noonke hedote badooshshubba hattono baasa hige sa`noommorenna sa`nanni hee`noommo gawajjubba deerru deerrunni hunate dandiineemmo gede amaallanni qara qara hedo gamba assa dandaanke baca faasho fantinotenna harinshonke biifissinote yiino.
Addis Ababu quchumi gashshooti hundaanni afantanno babbaxxitino hajo la`anno bissa gutunni malte aantete hadhanno gobboomittete songo aana amaalama hasiissanno yite ammantinota qara qara hedubba gamba assatenni komishiinete amaale minira uyitinota faajje assino.
Barete qara illacha ikkinoha hasaawu hedo gamba assate looso yawotenni harinsoonnitano buuxisino.
Hasaawu hedo doorate harinsho Itophiyu daga kaayyo afi`nummoro hedote kaimu korkaatta ge`ne, ayirrisamatenninna macciishshamatenni amaalama dandiineemmota leellishshinote yee coyi`rino.
Qarrubbanke buichuwanna malubba ragaanni sumuu yaate gadachannonkekkita harinshote aana beeqqitinori hajo la`anno bissa baala wodanchitino hajooti yiino.
Barete aana hedubba danchu garinni shiqqinota kayise; beeqqaano riqibbinonsata dagoomu kifillanna hajo la`anno bissa huuronna hasatto macciishshiishate luphiima wo`naalsha assitinota xawisino.
Hasawu hedubba xaphi assini woyteno hedubba gattannokki gede assate baqqi yitino beeqqo assinoonnita buuxisino.
Harinshotenni babbaxxino laooshshinna hedo noonsa daga mittu harira, xaadanna hedonsa soorri’ra dandiitino yiino. Kunino sumuu yaa hoongetenna hedote badooshshuwanke amaalamatenni tirate bude kaajjishate assineemmo seeda harinshora mitto qaafo ikkara dandaannota ammannanni yee qaru komishiinerichi coyi`rino.
Addis ababu quchumi gashshooti, miidiyu uurrinshuwa massagaanonna ogeeyyete, gobboomu amaale miidiyu foreme miillara, ga`labbote bissara, Adiwu qeelle qaaggo muziyeme massagaanoranna loosaasinete hattono woloottahono harinshote aana beeqqitino uurrinshuwaranna hallanyootaho galata shiqishino.
Harinsho xawo ikkitannonna daganna hajo la`anno bissano yannate mashalaqqubba afi’ransa qara hajo ikkasenni; yanna yannantenni mashalaqqubba iillitanno gede assatenna harinshote ragaanni huwanyo kalaqate assinoonni wo`naalshi luphiimaho yiino komishiinerichu.
Komishiine Addis Ababaho harissino bare keenatenninna aantete woyyeessa hasiissanno gumulshuwa woyyeessatenni hasaawu hedo gamba assate amaalete gafa lawino garinni Dirredaawu quchumi gashshootinna 12ku qoqqowubbara hattono federaaletenna diyaspooru deerrinni suffannotano egensiisino.
Baalanti hasaawu hedubba gamba yituhu gedensaanni komishiinete amaale mini lallawunni uyinoonnisi loosinninna yowote garinni ajandubba qineessate looso gumulanno yiinohu pirofeeserchu; tini harinsho jeeffanno woyte gobboomu songo aana amaale assinanni ajandubba dagatenna hajo la`anno bissara faajje assinannita buuxisino.
Abbebech Maatewoos
Bakkalcho Onkoleessa 29, 2016 M.D
