Addis Ababa:- Qoqqowunniha latate dhuka hedote giddo worre yannitte gibrinnu hayyo horoonsi’ratenni laalchimma lossate illachinshe loonsannita Wodiidi Qoqqowi Irshunna Kalaqamu Latishshi Biiro egensiissu.
Qoqqowoho badheessu loosinni 736 hektaare baatto wixunni diwa dandiinoonnitano Biiro xawissino.
Biirote sooreessi kalaa Haylemaariyam Tesfaye Itophiyu pireesete uurrrinshara xawisino garinni; qoqqowoho yannitte gibrinnu hayyo garunni horoonsi’rate ragaanni noo xe’ne keenatenni laalchimma woyyeessitanno hayyo loosu aana hosiisate illachinshe loonsanni hee’noonni.
Qoqqowoho tayxe laalchu dirinni 125 kume hektaare baatto gorsunni latisate mixi’ne 132 kume hektaare baatto mixote aleenni gumula dandiinoonnita egensiisino.
Konninni, xaa geeshsha 26 miliyoone kuntaali ale laalonna gati mu’ro laashsha dandiinoonni. Kunino, dikkote oolto ga’labbisate ragaanni jawa qeecha afi’rinota buuxisino.
Qoqqowu Ilaalaamma qooxeessuwa batidhannowa ikkasinni Laayyote latishshi loossannino 420 kume hektaare baatto aana xarapheezzaame laayyora illacha tunge 32 miliyoone ali manni wolqatenni beeqqanno gede assatenni wayillasote loossa gumulloonni yiino.
Laalchu dirinni badheessu loosinnino 741 kume hektaare baatto latinse qara qara wixinni diwate mixi’ne 742 kume hektaare baatto loonsoonniha ikkanna; konni giddonni 736 kume hektaare baatto wixunni diwantino yiino.
Kalaa Haylemaariyami xawishshi garinni; yannitte gibrinnu hayyo horoonsi’rate ragaanni bushshu madaabbara 132 kume kuntaala shiqisha dandiinoonni.
Wole widoonni, qoqqowoho danote bidhatto mootimmate irkonna dagoomu beeqqonni hattono hasiisanno laalcho hala’ladunni laashshatenni gargaratenna irko agadhine hee’ratenni wolaphate dandiisiissanno uurrinsha tantanneenna wodho fushshinoonni.
Konne looso harisate ikkitanno jiro gamba assate loosono loonsanni hee’noonniha ikkanna; aantetenni qoqqowu dano bidhachishshannokkiha ikkanno garinni illachinshe loonsanni hee’noonni.
Loosidhe galtinori kayissanni keeshshitinoha dooramino wixi shiqqo anje tirateno qoqqowoho dooramino wixi uurrinshu wixa batissanni shiqishshanno gede assinanni hee’noonni.
Bushshu madaabbari mixo diru giddo NPS 196 kume kuntaala ikkanna; badheessu yannara 135 kume kuntaala qoqqowo eessinoonnihu giddonni 132 kume kuntaala xaa geeshsha loosidhe galtinorira shiqinshoonni.
Gattino yannara eanoha 60 kumi kuntaali geeshsha ikkannoha aantano goyirete yannara horoonsi’nanniha ikkanno yiino.
Amsaalu Felleqe
Bakkalcho Onkoleessa 22 , 2016 M.D
