Addis Ababa:- 2016 rosu diri 12ki kifile gobboomu fonqolo aate hasiissanno qixxaawo assinanni hee’noonnita Sidaamu qoqqowi Rosu Biiro egeniissu.
Fonqolo woraqatunninna onlayinetenni / Tekinolooje horoonsi’ne dhaaddotenni/ uyinannitano Biiro ledde buuxissino.
Sidaamu qoqqowi Rosu Biiro Layinki Sooreessinna Rosa, Rosiisatenna Keenote handaari sooreessi kalaa Taaffese Gebremaariyaami Itophiyu pireesete uurrinshara xawisanni; tayxe 12ki kifile gobboomu fonqolo lainohunni hasiissanno qixxaawo assinanni hee’noonnita kule; kifilete rosi hafanfarannokki gede assatenni, guwuurshu rosi aamamanni afamannota kulino.
Hattono akeekishshu fonqolo sai Dotteessa 12 kayinse Onkoleessa 1,2016M.D geeshsha uyinoonnita coyi’re; kunino fonqolamaano roorenkanni umonsa qixxeessitannonna keentanno gede dandiissiisannoha ikkasi buuxisino.
Qoqqowoho xaphooma 4 kumi ali rosaano tayxe 12ki kifile gobboomu fonqolo adhate borreessantinota xawisinohu handaaru sooreessi; kurino uurrinshu rosi, hashshi qixxaawonna hallanyu fonqolamaano ikkansa huwachishino.
Qoqqowoho tayxe 12ki kifile gobboomu fonqolo lamu garinni uyinanniha ikkanna; woraqatunna tekinoloojete woy Onlayinete hayyonni uyinannita qummeessinohu kalaa Taaffese; qoqqowoho roore anga rosaano woraqatunni fonqolantannotanna Yirgaalametenna Hawaasi quchumira calla Tekinoloojetenni uyinannita egensiisino.
Korkaatuno, noo jiro ikkado ikkitinokkihura yaatenni Kompiwuterete anje hee’rase qummeessino.
Onlayinete fonqolamaano Hawaasi Yuniversitera fonqolantannota kayisannohu handaaru sooreessi; konnirano rosaano aantanno lamalanni hanaffe fonqolo adhinanni hayyo rosa hanaffannota lede xawisino.
Konni kaiminni, fonqolamaano gattinonsa yannanni hasiissanno qixxaawo assitanno gede baxxinohunni tiiunni qixxaabbanno gede huwachishino.
Fonqolu baxxinoricho ikkinokkita, rosu amuraati giddonni mitto ikkinotanna fonqolu giddoonni sa’’a hasiissannonsata ammante waajjanna bidhata hasiissannonsakkita huwachishino. Hattono gumansa ajishanno akati giddora e’annokki gede kalaa Taaffese sokkasi sayisino.
Qiddist Gezzaheny
Bakkalcho Onkoleessa 22 , 2016 M.D
