Addis Ababa:- Amaale yannate qarrubba sufanno doogonni tiratenni keere dirrisatenna addaxxinanni safo aana uurrisate qara ikkitinota gobboomu Amaalamme komishiine qaru komishiinerichi piroofeeser Mesfin Ariaya coyi’ri.
Addis Ababaho ajanda gamba assate amaalete gafa bero hananfi yannara qaru komishiinerichi piroofeeser Mesfin Ariaya coyi’rino garinni; amaale mootimmatenna dagate mereero noo xaadooshshe woyyeessate, addaxxinanniha poletiku amanyoote kalaqatenna sannate gongo’mitanni daggino giddoyidi qarrubba hasaawunni tirate lowontanni kaa`litanno.
Kaajjadonna adhamooshshu noosi gobbate mootimma kalaqate assinanni wo’naalshi seyootenni gumulamanno gede jawu qeechi noosetano xawisino.
Piroofeeser Mesfini xawishshi garinni; amaale gobbate dhaggenni haaro gafa fantannote. Batinye dhaggete harinshonni daga gobbase hajonni amaaltannonna muro uyitanno kaayyo ruukkadote woy dinonkanni. Gobboomu hajo batinyunni fullahaanotenna poletiku mannira agurre keeshshinoonninkanni.
Gobbate gede qarrubba sufotenni tira dandiinikkinni keeshshinoonnita xawise; qarrubba roore rumuxxitanninna sarraaqantanni dagginota buuxisino.
Itophiyu gobboomu amaalamme komishiine daga riqiwamaanote widoonni tiro noose beeqqo assatenni rumuxxitino qarrubba buicho baddanno gede kaayyo kalaqqinota buuxisino. Amaalete harinshonnino wolootta hajo la`anno bissa ledo taalo beeqqo assitanno gede dhaggete bare kalaqqinotano xawisino.
Komishiine qara hajubba kaima assatenni beeqqaano badate looso beeqqisaancho ikkino garinni gumultanni keeshshitinota coyi`rinohu piroofeeser Mesfini; amaalete gafubba mereerinni mittonna qara ikkinoha amaaletenni ajandubba badate harinsho faajjetenni hananfoonnita coyi`rino.
Harinsho aantete gumulantanno gobboomu amaale songo gumaamimmara qarunni kaa`litannota buuxise; barete aana afantinoti Addis Ababu quchumi gashshooti 119 worraddanni babbaxxitino dagoomu kifilla riqiwatenni ajanda gamba assinanni amaalete gafara beeqqitanno riqiwamaano ikkansa coyi`rino.
Bare Onkoleessa 27/2016M.D geeshsha keeshshitannota coyi`re; komishiine amaaletenni bandanni ajandubbara garunni waaga aatenninna aantete gumulanni ajandu qixxaawo loosi ledo waaxantanno gede assate yawo garunni fultannotano buuxisino.
Abbebech Maatewoos
Bakkalcho Onkoleessa 22 , 2016 M.D
