– Itophiya albisanna heewisamaancho assitanno pirojekitubba kaajjite suffanno
Addis Ababa:- Itophiya albisanna heewisamaancho assitanno pirojekitubbanna loossa kaajjite suffannota Xaphoomu ministirchi Abiy Ahimed (Dr.) xawisi.
Xaphoomu ministirchi Abiy Ahimed (Dr.) gargarooshshu Ispeeshaalayizide Hospitaale sa’u muli barrubba giddo maassi`re looso hanafisiisino.
Xaphoomu ministirchi Abiy Ahimed (Dr.) amuraatu aana sayisino sokkanni; manchi beetti ajuuja heedhusironna daga mereersitino loossa hanafiro yanna adhannoha ikkara dandaanno ikkinnina ilama jeefissanno. Itophiya albisanna heewisamaancho assitanno pirojekitubbanna loossa kaajjite suffanno yiino.
Gargarooshshu Ispeeshaalayizide Riferaale Hospitaale safote kincho worrinkunni 35ki diri gedensaanni soorrote gashshootinni jeefinsoonnita ikkase baxxitinota assannota buuxise; Hospitaale yannitte ikkaseno xawisino.
Gobbayidi gobbuwara afantinanni fayyimmate ogeeyye asalu noo’neta Itophiyu ammantanno yiinohu Xaphoomu ministirchi; Itophiyu noosekki jironni baca ooso rosiisse dokitere assituhu gedensaanni baalante kalqera tuqqe owaattanni afantanno yiino.
Kunino ikkino korkaati gobbate gede ikkado safote latishshi hooganna ikkado baatooshshe baata hoogatenni ikkinota xawise; baalante kalqera Itophiyu xagisaano babbaxxitino Hospitaallara loossanni leeltannota xawisino.
Xaa yannara gobbayidi gobbuwara afantannori Itophiyu ilama ikkitino xagisaano asalensa Itphiyaho qolte baattanno yanna iillitinota xawisatenni; noo`ne luphi yitino ogimmate ikkadimmanni diru giddo mittu aganira daggine owaattinanni gede woshshatto shiqisheemmo yee coyi’rino.
Ogeeyye Itophiya dagge wolootta ogeeyye rosiisseemmero aantino boode dirra giddo xagisote handaarinni woyyino gumi daannota buuxise; Itophiyuno jiroo`minonna ikkadimma noonsa manninna tekinolojete ayidde ikka dandiitannota huwachishino.
Maassiinsoonni Hosiptaale luphi yino tekinolojete deerrinni ijaarantinota xawise; konni gedensaanni mootimmate loosu sooreeyye gobbate giddo xagisidhannota buuxisino.
Abbebech Maatewoos
Bakkalcho Onkoleessa 15, 2016 M.D
