Addis Ababa:- Hawaasi Yuniversite xaphoomu Ispeshaalayizide Hospitaale reeshshunna hadhaawate ledo amadisiisantino buuxo owaante muli yannagiddo hanaffannota xawinsi.
Hawaasi Yuniversite Riferaale Hospitaalenna xaginaatu Kolleeje qaru Dayirikitere (Halamaanchu pirofeeser) Alemu Xa’miso Itophiyu pireesete uurrinshara xawisino garinni; Yuniversite muli yanna giddo reeshshanna hadhaawate ledo amadisiisantino buuxo assa hanaffanno.
Reeshshunna hadhaawate ledo amadisiisaminohunni assinanni buuxo seeru ledo xaaddannota ikkasenni; konni albaanni qooxeessaho uynanni owaante nookkihura Addis Ababa sonkanni buuxo assinanni keeshshinoonnita kulinohu qaru Dayirikiterichi; xaa yannara buuxote mereersha ijaarreenna muli yanna giddo owaante aa hanaffanno yiino.
Sa’u muli yanna giddo Kaanserete caangu xaginaati owanteno hananfoonnita qummeesse; xaa yannara lowontanni hala’litanni dagginore mundeete xiiwo, sukkaarenna kaansere labbino taraabbannokki dhibbuwa daganke gawajjitanni afantannota coyi’rino.
Baxxinohunni, caangu xaginaati owaante Hararete, Addis Ababahonna Jimmaho calla uynanni keeshshinoonniha ikkanna; Hawaasi Yuniversite tenne owaante hanafase haammata qooxeessu daga xeertidhe hadhukkinni horoonsidhanno gede kaayyo kalaqqinota Alemu Xa’miso (Ha/pro) buuxisino.
Caangu xaginaati owaante wirro wirro hinge uynanniha ikkasinni; owaante hasidhannori duucha yannara hodhitanni woxensanna yannansa gudatennino sae jawa gede gawajjantanni keeshshitinota kayse; xa kayinni Hawaasa qansoonniti caangu maashine owaante hasidhannori xaadannonsa qarra gatissannota ikkase buuxisino.
Hawaasi Yuniversite Riferaale Isipeshaalayizde Hospitaale caangu xaginaati mereersha calla ikkikkinni umosi dandiinoha kaanserete mereersha uurrisa dandiitinoha ikkanna; addi addi kaanserete dhibbi xaginaati owaante mereershano muli yanna giddo maassiinseenna owaante aa hanaffanno yiino.
Kaanserete dhibbi xaginaati mereershi owaante aa hanafinkunni sase dirra kiirsiisinoha ikkanna; xaa yannara kayinni handaarunni uynannita wo’ma owaante aanno gede assinoonnita kulino.
Hawaasi Yuniversite xaginaatu kolleejje xaa yannara xaginaatu owaante isilanchimma buuxisiisatenni, owaante hasidhannori tootayyo gatisa hattono Fayyimmate ministere wortino ragi garinni albaanni uynanni keeshshinoonnita handaaru owaante woyyeessatenni dagoomu guuta ikkinoha handaaru owaante afi’ranno gede loossanni afantannota xawisino.
Wole widoonnino, tiiu xaginaate lede woloottano haaruudde pirogiraamma hanafisiisate illachinshe loonsanni hee’noonnita kulinohu halamaanchu pirofeeser Alemu; ikkollana, hasi’noonni yanna giddo hanafisiisate kayinni bayichu ruukkamme xaaddinota qummeessino.
Darre gowate owaantennino mitte yannanni 18 xagisi’raanora owaante aate dandiisiisanno mereersha ijaarranni hee’noonnita egensiisino.
Hawaasi Yuniversite Ispeshaalayizde Riferaale Hospitaale konni albaanni 6 miliyoone owaatamaanora calla yine ijaarroonniti; xaa yannara kayinni 18 miliyoone ale dagara owaante uytannoha ikkasinni albaanni uynanni keeshshinoonni owaantenna haaruudde pirogiraamma hanafisiinsirono halashshate baychu ruukkamme xaaddinota kule; xaaddino qarruba tiratenni dagoomaho isilancho fayyimmate owaante aate jawa illacha tunge loonsanni hee’noonnita huwachishe muli barra Reeshshunna hadhaawate buuxo owaante assa hananfannita buuxisino.
Amsaalu Felleqe
Bakkalcho Onkoleessa 8 / 2016 M.D Hamuse
