Addis Ababa:- Sa`u tonne aganna giddo 52 kumi wedellira loosu kaayyo kalaqa dandiinoonnita Sidaamu qoqqowi Loosu Dandootenna Interprayizootu Latishshi Biiro xawissu.
Biiro baajeettete dirinni 61 kume wedellira loosu kaayyo kalaqate mixidhinotano xawinsoonni. Biirote Sooreette dukko Hageretsiyoon Abbebe xawissino garinni; sa`u tonne aganna giddo 52 kumi wedelli babbaxxino handaarinni loosu kaayyo horaameeyye ikkitino.
Tayxe baajeettete dirinni 61 kumi wedellira loosu kaayyo kalaqate mixi’ne loonsanni hee’noonnita qummeessitinoti Sooreette; haaro loosu hayyonni baajeetete diri jeefirono gattino agannanni 30 kume wedellira loosu kaayyo kalaqate wo`naalshubba assinanni hee`noonnita kayissino.
Loosu kalaqo gobbate giddonna gobbayidi gobbuwanni qole Loosunna Dandoote ministere injeessitanno doogonni wedellu horaameeyye ikkitanni nootano coyidhino.
Biiro Yuniverisitetenninna Kolleejjetenni maassantino wedellira qajeelshano uytino. Qajeelshu wedellunniha eewaancho laooshshe jawaachishate illachishinoha ikkasi xawissinoti Sooreette; labbino loossa diru dirunnino suffanno yitino.
Hawaasi quchumi kantiiwi Kalaa Mekuriya Mershaye isi widoonni; gibirinnunni, manaadda Industirranna konistiraakishiinete handaarinni looso kalaqa dandiitanno wedelli kiiro lossate mootimma gobbate deerrinni ‘Start App” jawaashishatenni looso kalaqanna gobbate lophora qeechansa fultanno loosu kalaqaano irkisatenni gobbayidinni dagganno laalchubba gobbate giddo laalchubbanni riqiwate illacha uyte loossanni no yiino.
Gaazeexu Odeessaanchinni
Bakkalcho Onkoleessa 8 / 2016 M.D Hamuse
