Addis Ababa:- Kinchunninna simintotenni loonsanni buusinni calla ikkikkinni gutu dhaggenni sumuu assanno buusinni daganke mittimma buuxinseemmo yiino; Xaphoomu ministirchi Abiy Ahimed (Dr.).
Xaphoomu ministirchi Abiy Ahimed (Dr.) Abbay xashshi aana ijaarroonni buusa tenne lamala giddo maassiise looso hanafisiisino.
Xaphoomu ministirchi tenne yannara assino hasaawinni; ninke lame buusa ijaara hasi’neemmo; daganke mittimma buuxinseemmo yineemmohu kinchunninna simintotenni loonsanni buusinni calla ikkikkinni gutu dhaggenni sumuu assanno mittimmate buusinni ledoonti yiino.
Buusu dagate mereero noo xaadooshshse kaajjishatenna daddalu injo halashshate luphiima horo noosiho yiino.
“Itophiyaho hattono Amaaru dagara injaannoha, Bahir Daareteno biinfille ikkannoha jawa looso gutunni maassiisate dandiinoommo” yaanniiti coyi’rinohu.
Dagate mereero noo hasiissannokki dhagge korkaatinni lollongitanni noo mittimma kaajjishshara dandiitanno gutu dhaggenni sumuu assanno buusa ijaara hasi’neemmo yiino. Biifadunna jawiidi buusi ayimmanke, hasattonke, halchonke leellishanno yaanni xawisino.
Wirro wirro hige Itophiyaho Jireenya halchineemmo yinanna hasaawanke huwattinokki mannooti konni buusinni Jireenyu yaa mayyaatero huwattanno gede hasi’neemmo yiino.
Jireenyu techora ikkikkinni ilamate loosannoha, Itophiyu bikkinni jawa asse loosannoha, dagate e’’anno qaalenna loosunni hanafisiisinoha jefisiisatenni buuxisannohono yiino.
Amaaru daga dhaggese bikkinni umose latisse, umose woyyeessite qarru giddonni fultanno gede halama hasiissannotano huwachishino. Ninke tenne jawa dagara noonke halchonna hasatto mittimmase, keerese agarte, latishshase buuxa dandiitanno gedeeti yiino.
Dubbu giddo afantanno roduuwinkera woshshatto shiqishammonsara hasireemmo yiinohu Xaphoomu ministirchi techo Amaaru massagaancho afi`rino; Aregga Kebbedeha lawino ammanamino jawaata massagaancho afidhino, ani Amaaraho, Amaaraho uurreemmo yaannohu, Amaaru horo kisama dinose yaannohu ge’’e wodanchatenni daganna qoqqowosi kaa`la dandaanno looso loosa dandaanno yiino.
Dubbu giddo afantanno roduuwira mimmito shaa ikkitonke; bunshe ikkitonke Itophiyu daga taalo ayirrissannokki harinsho horo uyitannonkekkihura amme qoqqowi’nera higge; qoqqowo`ne latisse; keere`ne agarre yaanni woshshatto shiqishino.
Hatto assitinanni woyte ninkeno wo’mu wodaninni qoti’nera uurrine ledo`ne loonseemmo. Hasiisannokki coyinni mimmito shaa ikkitino yaammo’nera hasireemmo yiino.
Itophiyu jawa gobbaati; bacu dani kipho giddo keeshshitino; xa hasiissannonketi wolapho, rodiimmanna ayirrisama hattono taalo qansicha ikkine Itophiya wo`naalshunni ijaara ikkinohura tenne bayira gobba ayirrinyese agarre oosonkera tareessa dandiineemmo gede qotinkera uurritinanni gede Amaaru dagaranna mootimmate maganye yaa hasireemmo yiino.
Bahir Daarete quchumi gashshooti massagaano sa’’annokki sumuda wortanno gede maganye yiino. Itophiyaho injanno buusa biifadu quchumira wora dandiitino ogeeyyeranna massagaanoteno galata shiqishino.
Afrikaho heewisamaancho anfannisekki Gorgoru pirojekitera lame barrubba sayisinota kayisinohu Xaphoomu ministirchi; Gorgoru gedeeha kaajjado, biifadonna lowontanni maala`lisanno looso xaa geeshsha dila’noommo yiino.
Gorgoru pirojekite la`anno gedenna agartanno gede maganye yiino. Bacu hananfeemmohunna jeefinseemmo loosi noonke yiinohu Xaphoomu ministirchi; daga mootimmate qotira uurrite kaa`litanno gedeno woshshatto shiqishino.
Xaphoomu ministirchi Co’itte Itophiya co’icha quchuma kalaqate mittu barrinni 50 miliyoone birre gamba assate loosanni noo loosinni baalunku beeqqanno gede woshshatto shiqishino.
Amadisiisaminohunni sa`u lamala giddo Xaphoomu ministirchi Abiy; Gadunniha addiha miinju zoone ijaarsha Oromiyu qoqqowiranna CCECC mereero assinoonni Gadu miinju zoonera Lumenniha daddalu qasiiso latisate loosira sumiimmete amuraate hanafisiisino.
Xaphoomu ministirchi amuraatu aana xawisino garinni; sa`u boode dirra giddo Itophiyaho gibirinnu handaarinni soorro abbate loonsanni keeshshinoonni. Gibirinnu handaarinni afi`noonni soorro Industiretennino sufisa hasiissanno yiino.
Abbebech Maatewoos
Bakkalcho Onkoleessa 8 / 2016 M.D Hamuse
