Tayxe badheessu yannanni qoqqowoho baalante qarqartora rosaminohu aliidi xeeni hee’rannota Sidaamu qoqqowi danote bidhatto loosu massago komishiine xawissino. xaa yannarano qoqqowoho baalante woraddara rosaminohu aliidi xeeni hee’rasi komishiine uurrinshankera kultino.
Qoqqowu danote bidhatto loosu massago komishiine kimishinere Abarri Wiilihu Itophiyu pireesete uurrinsha ledo assino hasaawinni xawisanni; qoqqowoho baalante woraddara rosaminohu aliidi xeeni hee’rannota metiroloojete himani ejense fushshitino mashalaqqe leellishshannota kule; kunino badheessu wixira dancha ikkirono mite mite woraddaranna baadiyyete olluubbara kaadenna wisho karse gananno xeeninni wixunna minnate aana gawajjo iillitanni noota xawisino
Qoqqowoho konni alba mite mite lolahunna baatto shirri yaate dano kalaqantanno qarqarto hee’rase kayisannohu komishinerichu; konninni harunsine lolahohonna baattote fottoqamara reqeccaabbino qarqarto bande balaxote qorophishshu looso loonsanni hee’noonnita xawisino.
Lolahoho reqeccaabbinoreeti yine bandoonni qooxeessubba mereerinni Hawaasi quchumira mite mite sinu quchumma lendanna, Lokka Abbayyu, Wondo Gennetetenna Hawaasi Gaangaawi woradda qarunni kullannire ikkitanna; tenne qoxeessubbara dagateno huwanyo kalaqate looso loonsoonnita Komishiner Abarri egensiisino. Quchummateno lolahu ha’ranno boo’’e fanatenni gatamarshansa taashshinoonnita lede xawisino.
Aantete hawadi yanna albaanni nooha ikkasinni deerru deerrunkunni baadiyyeteno ikko quchumaho gashshaanotenni massagantanno wolqa uurrinse qinaambe loonsanni hee’noonnita kayisino komishiinerichu;baxxinohunni baadiyyete hee’ranno manni hajote mininni fule ha’rannonna higanno yannara lolaho uurrine sayisa hasiissannota huwachishe; lolaho shota gede la’ne aanaho qaanfanni ha’ra hasiissannokkita qorophisiisino.
Sa’e sa’e “hooffishaamme” baattora winxoonni wixi aana waayi garanni noo daafira loosidhe galtinori konne waa doogo darte harisa, gide shuqunanna harunso assa hasiissannota huwachishinnohu komishiner Abarri; xeena gananno yannara ishine mininni fushshine lolahu ha’ranno doogora tuga hoogatenna doogo fanatenni lolaho harunsite kalaqantanno danonni umonsanna jajjansa agadhanno gede duu’re huwachishinno.
Qiddist Gezzaheny
Bakkalcho Onkoleessa 1 / 2016
