Addis Ababa:- Girji quchumi Soojaati Sidaamu zoone giddo afamanno Hookkote woradi hundaanni afamannoha ikkanna quchumu umisi pilaane afi’re 2002M.D maazzagaaja ikkino.
Quchumu lophonna safote latishshi iillo ledo amadisiisaminohunni Itophiyu pireesete uurrinsha bilbilunni hasaawissinohu Girji quchumi maazzzagaaju mini loosu harisaanchi kalaa Selemoon Taaffese xawisanni; quchumu yanna yannatenni hala’lanni afamannoha ikkasinni safote latishshi wo’munni wo’ma iillinokkita kulanno.
Baxxinohunni caabbichchu tuqa hooga danchu gashshooti xa’mo ikkite keeshshitinota xawisino. Konnirano aantete jawu loosi agarannonke yaanno.
Konni garinni tayxe diro baxxino garinni safote latishshi iillo halashshate wo’naalloonnita coyi’rannohu kalaa Selemooni; gumulloonni loossa mereerinnino quchumu giddo caabbichu xuruura diriisate wo’naalloonni.
Quchumu pilaanete garinni calla massagama hasiissannosi daafira babbaxxitino yannara quchumu giddo baattote horro, huxxamanna baattote xiiwo labbinori seeriweelo millimillo heedhanno; konne assoote gargarateno tantano kaajjinshe yanna yannatenni seeriweeloota bande qaafo adhinanni hee’noonnita loosu harisaanchi xawisino.
Seeriweeloota badateno qooxeessu massagaanonna dagate ledo hasaambe seeru qaafo adhinanni hee’noonniha ikkanna tenne odoo qixxeessinummo yanna geeshsha assinoonni millimmonni 750 kaare baatto seeriweelo doogonni horrantinota baattote baanke qolloonni yiino.
Quchumu yanna yannatenni hala’lanni haranni nooha ikkasi ledo amadisiisame 7.5km quchumu giddo caabbichu xuruura diriirsate wo’naalloonnita kule; quchuma lossate e’’o halashsha hasiissannohura konni ragaanni amandoonni mixo gumulate wo’naalloonni yee dirunni gumulate amandoonni mixonni 78% jeefisa dandiinoonnita egensiisino.
Quchumu giddo qara dagate hasatto ikkitinota safote latishshuwa halashshate aana illachinshe loonsannita xawisinohu kalaa Selemooni; gumullanni latishshu loossa mereerinni quchumu co’ichimma agarate ishine hunnanni base qixxeessanna qeeru owaante uyinanni base kalaqa balaxo uyinanni hajubba ikkansa buuxisino.
Muli yanna giddono qoqqowu Keerunna ga’labbote Biiro ledo halamatenni 4 Miliyoone birra fulo assine poolisete borro mine ijaarsha jeefinsoonnita xawisino.
Aantino yanna giddo caabbichu xuruura diriirsa, xalalu anganni wayi iillo halashsha, doogote latishshinna qarunnino quchumu e’’o lossa illacha tunge loonsanni hajubba ikkansa buuxisino.
Girji quchuminna qooxeessu jawa kalaqamu jiro nooha ikkasinni qooxeessaho Investimentete handaarinni bobbahate hasidhanno dureeyye heedhuro dagge loosidhanno gede loosu harisaanchi woshshatto assino.
Qiddist Gezzaheny
Bakkalcho Onkoleessa 1 / 2016
