Addis Ababa:- Sa’u honse aganna giddo 3 miliyoone ale daa”ataano Sidaamu qoqqowo daa”attinota Qoqqowu Woga Turizimenna Ispoortete Biiro egensiissu.
Biirote Layinki Sooreessinna turizimete handaari sooreessi kalaa Abbebe Maarimo Itophiyu pireesete uurrinshara xawisino garinni; qoqqowo dagganno daa”ataano kiiro yanna yannantenni lexxitanni daggino.
Sidaamu qoqqowi sa’u honse aganna giddo 3 miliyoone gobbate giddo daa”ataanonna 20 kume gobbaydi gobbuwa daa’’ataano adhinota coyi’re; konninnino 1.5 biliyoone birre babbaxxino garinni qoqqowu miinji aana hosiinsoonnita xawisino.
Daa”ataano qoqqowo dagganno woyte 3-4 barrubba geeshsha keeshshitannota coyi’re; keeshshonsa yanna seedisatenna sette barrubba geeshsha keeshsha dandiitanno gede assate iillote latishshubba halashshate loossa loosantanni nootano buuxisino.
Xaa yannara noo iillo Yirgaalamete quchuminna qooxeessu, Hawaasi quchuminna qooxeessu amma`note ayyaannaranna gangalatate, muxxe cea afantannowanna kalaqamunnihu Iibballichu way noohu Wondo Gennetete qooxeessira ikkinota buuxise; qoqqowu lame pirimiyerliigete kilabba noosiha ikkasinni lekkate kuwaase godo`le korkaatinni daa’’ataano qoqqowo dagganno yiino.
Daa”attote (Turizimete) iillo lossate Hawaasinni 90 kiilo meetire xeertinyira afamanno Garambi qooxeessira dagooma hanqaffino daa”attote iillo lattanni noota coyi’re; loosu mittu diri gedensaanni goofanno woyteno haammata daa”ataano adhannota buuxisino.
Lokka Abbayyunnita gobboomu paarke lede daa’’atote iillo assateno qoqqowu loosanni no yiino.
Aananno 2019M.D daa”ataanote kiironna handaarunni afi’nanni eo erotenni lossate hende loonsanni hee`noonnitano qummeessino.
Doogote latishshi daa”attote handaari lophora badhe ikkinota coyi’rinohu kalaa Abbebe; qoqqowoho Federaalete mootimmanni loosantanni noo lame kolishsho doogo pirojekitubba jeeffanno woyte daa”ataanote kiiro lexxara qeechu heerannonsata xawisino.
Xaa yannara qoqqowoho 16 ikkitanno 1-4 geeshsha beeddakkote deerri noonsa Hoteella no. Aanteteno 20 ikkitanno beeddakkote deerri Hoteella karsantannori noota coyi`rannohu Biirote Layinki Sooreessi; aananno dirinni jeefisantanno haruudde beeddakkote deerri Hoteella nootano buuxisino.
Noo Hoteella ikkado ikkitinokkihura Hoteella, Rizoortubbanna Loojubba ijaarsitanno dureeyye qoqqowo dagganno gede egensiisate loossa loosantanni nootano coyi`rino.
Baalunku manni Sidaamu qoqqowira daye qoqqowo da”aatanno gede woshshatto shiqishinohu kalaa Abbebe qoqqowu qooxeessu budinni “Dayoe bushshu” yee da”aataano adhate aye woyteno qixxaawaho yiino.
Abbebech Maatewoos
Bakkalcho Onkoleessa 1 / 2016
