Addis Ababa:– Sidaamu qoqqowi Rosu Biiro rosiisaanote ogimmate ikkadimma keeno buuxo fonqolo qoqqowu deerrrini techo Onkoleessa 1/2016M.D aa hananfoonnota xawinsi.
Qoqqowu Rosu Biiro 2ki Sooreessinna Rosiisaanotenna Rosu Minna Massagaano Latishshinna ikkadimmate Fajjo Aatenna Haaroonsate Handaari Sooreessi Kalaa Tekilu Adula xawisino garinni; rosiisaanote ikkadimma keeno gobbate gede 2005M.D hananfe worroonni faasho ikkitinota xawise; Sidaamu qoqqowi mootimma deerrinni kayinni 2013M.D hananfe rosiisaanote uynanni keeshshinoonnita egensiisino.
Konne fonqolo adhate borreessantinori kiiro 11 kume 384 ikkitanna; Uminna 2ki dirimi Rosu minna digirenna dipiloomu deerri rosiisaano ikkitinota Sooreessu xawisino.
Fonqolo qoqqowu deerrinni 6 mereershuwara Hawaasi quchumi mereershira Itophiya Tiqidemi Rosi Mine, Lakkote mereershira Lakko 2ki Dirimi Rosi Mine, Yirgaalamete mereershira Yirgaalame 2ki Dirimi Rosi Mine, Alatta Wondi mereershira Alatta Wondi 2ki Dirimi Rosi Mine, Hulate mereershira Hula 2ki Dirimi Rosi Minenna Daayye mereershira Qeweena Gaaxa 2ki Dirimi Rosi Mine uynannita kalaa Teklu lede buuxisino.
Rosiisaano fonqolo adhitannohu qajeelte rosse fultino golinninna rosiisate hayyonni ikkinotanna fonqolantanni noorino balaxxe fonqoloho borreessantinori callu ikkasinna qixxaawo garunni assatenni rosiisaanchimmate ikkadimma buuxo adhate dancha qixxaawo assitinoreeti yiinota Biirotenni afi’noonnui mashalaqqe faajje assitino.
Amsaalu Felleqe
Bakkalcho Onkoleessa 1 / 2016
