- 15 kume ale Tiraakiterooti Irshu owaante uyitanni no
Addis Ababa:- 2016/17 laalchonna laalchimma lossate 19 miliyoone kuntaali ale bushshu madaabara hiratenni 11 miliyoone kuntaali ale ikkannoha baatto loosidhe galtinorira tiqinsanni hee’noonnita Gibirinnu ministere egensiissu.
Gibirinna yannoonsate loonsoonni loosinni 15 kume ale Tiraakiterooti gibirinnu loosi aana beeqqansa xawinsoonni.
Gibirinnu ministere dagate xaadooshshi loosu gumulsiisaanchi kalaa Kebbede Laaqew Itophiyu pireesete uurrinshara xawisino garinni; 2016/17 badheessunna goyirete yanna laalchonna laalchimma lossate 19 miliyoone kuntaali ale bushshu madaabara hidhine 11 miliyoone kuntaala ale ikkanno baatto loosidhe galtinorira iillinshanni afammanni.
2016/17 laalchu dirinni laalchonna laalchimma lossate 19.4 miliyoone kuntaala bushshu madaabari hidho gumulloonniha ikkanna; konni giddonni 11 miliyoone kuntaali ale ikkannoha gobbate giddora hodhisiinse baatto loosidhe galtinorira iillinshanni hee`noonni yiino.
2016/17 laalchu dirinni owaantete aana hosanno gede hirroonni 19.4 miliyoone kuntaali bushshu madaabari giddonni xibbuunni 25% ikkannohu arri gorsu Qamade latishshira hosinoha ikkanna xibbuunni 20% ikkannohu badheessaho hosannotanna xibbuunni 55% ikkannohu qole goyirete hosannoha ikkanno yaanni huwachishino.
2014/15 laalchu dirinni kalaqaminohu bushshu madaabari qarri 2016/17 xaadannokki gede hidhote amanyoote woyyeessate; balanxe hidhate, tuqishsha harunsatenna qorqorate looso loonsanni hee`noonni yiinohu kalaa Kebbede; kuni ikkasinni ikkado ikkino bushshu madaabari badheessaho shiqanno gede dandiisiisino yiino.
Tayxe dirinni bushshu madaabara balanxe hidhinanni gede assinoonnita xawise yannanna wolqa garunni horonsiratenni sae baatto loosidhe galtinori muddantukkinni hasidhu saatera shotu garinni afidhanno gede kaa`lannonsa yiino.
Kalaa Kebbede xawishshi garinni; gobbate giddora hodhisiinsoonnihu 11 miliyoone ali bushshu madaabari duunnanniwiinni qoqqowubbate baatto loosidhe galtinori maamarrara tuqinsenna loosidhe galtino dagara iillinshanni afammanni; tuqishshu aana seerimale assoottubba heedhannokki gede harunsitannonna qorqortanno wolqa uurrinse loonsanni hee`noonni; tuqishshu aanano luphi yino qarri dino.
Gobbanniha gibirinnu handaara yannoonsatenni laalchonna laalchimma lossate loonsanni hee`noonnitano kalaa Kebbede huwachishino.
Gibirinnu mekaanayizeeshiinenna babbaxxitino tekinolojubba horonsi`rate loonsanni hee`noonni loosinni arri gorsu Qamade latishshinni; badheessunna goyirete Irshi aana 15 kume ale Tiraakiteroota horote aana hosiisate looso loonsanni hee`noonnitano hattonni.
Gibirinnu mekaanayizeeshiine uduunne yaano Tiraakitere,; Kombayinerenna babbaxxitino tekinolojubba ga’rafote gobbaanni ikkitino doogonni maamarratenninna baatto loosidhe galtinorinni e`anno gede assinanni hee`noonni yiinohu loosu gumulsiisaanchi tini loosu hayyono kiironsa lossitanni no yiino.
Laalchonna laalchimma ledate gibirinnu shiqisho lossatenna yannantenni tuqisate looso illachunni loonsanni afammannitano buuxisino.
Abbebech Maatewoos
Bakkalcho Onkoleessa 1 / 2016
