Addis Ababa:- Abli bareeddanni loosantino jajjabba qeellete dhaggera tini ilama hasiisanno afanshanna ayirrinye aa hasiissanno yitino; IFDR Pirezidaantitte Sahileworq Zewude.
83ki bareeddate qeellete barra “Gobbate baxilli bareendenni afi’noonni qeelle” yaanno adawarshinni addi addi amuraatinni ayirrinsoonni.
Amuraatu aana afante hasaawa assitinoti IFDR Pirezidaantitte Sahileworq Zewude xawissino garinni; albi annuwinna amuwi bareeddankenni loosantino jajjabba qeellenna qeellete dhaggera tini ilama hasiisanno afanshanna ayirrinye aa hasiissannonsa.
Hundi bareedda boonnanna bobboodda e’e Faashiste Xaaliya olante lubbonsa kakkalte gobbanke ayirrinye agarsiissino yitinoti pirezidaantitte; bareedda mundeensa dunte, miqqansa cancante abbitino qeelle ikkasenni techoo ilama dhagge garunni affanno gede assa hasiissannota xawissino.
Bareedda mittimmatenna gobbate baxillinni horraano wolqa shollite higganno gede assansanni wulata anfoommore, ayirrinseemmorenna qaangeemmore ikkatenni qeelle hegersa hasiissanno yitino.
Pirezidantitte xawishshi garinni; qeellete dhagge roorte xabbannohu daga gutu dhaggensa garunni affuro, sumuu yituronna dhaggete Xiinxallaanora hattono ogeeyyera hasiisanno afansha uyiturooti.
Dhagge ayirrisatenni aleenni baalunku safo ikkino keere bowirsa, agaranna keere huntara dandiitanno ikkitubba heedhuro tirate sharrama baalunku gumulara hasiissannota qara hajo ikkase kayissino.
Keeru riqiwo nookkihonna luxuphe bairo qolate luphiima waaga baatisiisannoha ikkasinni baalunku keeru hala’lara loosa agarantannonke yitanni Pirezidaantitte sokkase sayissino.
Mite mite qarqartora leellannohu keeru hoongi goxano ho’lankera hasiissanno yitinoti Pirezidaantitte; gobbatenna dagate keerira baalunku balaxo aa hasiissannota kayissino.
Qeellete dhagge qaangeemmo woyte Itophiyu olu dhagge kullannise gobba calla ikkitukkinni horrara dayino diina qeelleemmotanna lophonke sufisiinseemmota ikkitara hasiisanno yitino.
Hundi Itophiyi bareedda maamari Pirezidaantichi Lij Daanieel Jotte Mesfini isi widoonni; qeellete ayyaana hendeemmo woyte gobbate baxilli kakkalonni uurrino keerenna wolapho agaratenna hanafantinore babbaxxitino latishshu loossa sufisiisatenni ikka hasiissanno yiino.
Techo afi’noommo keerinna ayirrinyi bareeddanke mundeenna miqichinni afi’noonnireeti yiinohu Pirezidaantichu Lij Daanieel Jotte; aantino ilama Itophiyu lopho rahissanno hajubba aana beeqqaano ikka noonsata huwachishino.
Gargarooshshu olanto mannu jiro massagooshshi qaru biddishshu sooreessi Leetenaal Jeneraal Hacaalu Shelleme tenne yannara coyi’ranni; Itophiyu daga gobbansa gashshootu mittimmanna wolapho aana daannonsaha hasidhannokki daga ikkansa daafira afi’noonni gumi xawishsha ikkasi kayse; gargarooshshu olanto bareeddate ayyaana uddidhe dagate hobbaatira sharrantanni noo olantooti yiino.
Olanto gobbate keeri ammansiisannoha ikka geeshsha baattanno waaga kaajjishshe suffannota qummeesssino.
Sidaamu qoqqowi Pirezidaantichi kalaa Desti Ledamohu sai Sambati barra ayirrinse sa’noonni gobboomu qeellete barra lainohunni sayisino sokkanni; baalunku bero ikke sainorichinni rosicho adhine aantete noo yannara jawaata qansoota ikkino yaanni huwachishino.
Qiddist Gezzaheny
Bakkalcho Onkoleessa 1 / 2016
