Addis Ababa:- Daga keereho, mittimmatenna latishshaho illachishatenni halante loosa noonsata Xaphoomu ministirchi Abiy Ahimed (Dr.) coyi’ri.
Wollaggu zoonera Neqqemte quchumira soorrote mootimma irkote dira “Wollaggu keerunna Jireenyu baatto” yaanno adawarshinni shoolente Wollaggu zoonna daga beeqqitino irkote dira bero Wollaggu Istaadiyeemera harinsoonni.
Basete leellinohu Xaphoomu ministirchi Abiy Ahimed (Dr) tenne yannara assino hasaawinni; daga keereho, mittimmatenna latishshaho illachishshe halamatenni loosa noonsa yiino.
Daga qooxeessinsa keere agadhanna hegersa noonsata huwachishe gobbate lopho buuxisiisateno halama noonke yaanni sokkasi saysino.
Duuchunkuri aleenni keerenna latishshaho ikkitanno hedubba burqisa lowontanni hasiissannota kaysinohu Xaphoomu ministirchi; ilama gawajjitanno assootubba agurre mimmitu ledo hasaambenna amaalamme mittimma kaajjishi’ra hasiissannota huwachishino.
Miinju ragaannino soorrote albaanni jawu qarri noota kaysinohu Xaphoomu
ministirchi; soorrote gedensaanni kayinni jawa miinju lopho maareekkantanni noota xawisino.
Soorrote kawa loosantino loossanni Gibrinna lede quchumma soorrate, gobbate lopho woyyeessate illachinshoonnitano kaysino.
Hanafoommo loossa timo ganatenni gufissannonke wolqa dino; gobbanke soorrate wodaninni loonsanni hee’noommo yiinohu Xaphoomu ministirchi; Itophiyu Jireenya buuxisiiseemmo; mittimmaseno agarantanno. Afriku giddo ayirrisantanno gobba ikkitanno yiino.
Latishshanna lophonke ollohisanno keeri hee’ranno gede loosa hasiissannotano baalunku Itophiyu qansootira huwachisha hasi’reemmo yiino.
Wollagga soorra hasi’neemmo; mixonke diinnate assootinni gufidhannokki gede kayinni daganke waatinkera ikka noonsa yaanni sokkasi sayisino.
Soorrote mootimma irkote diri aana “Soorro hegersineemmo”, “ Keerunni ikko latishshunni lawishsha ikkineemmo”, “Kakkachimma effi’ne gimbeemmo” yitannonna wolootta sokka sayinsoonni.
Baseteno Xaphoomu ministircha lede Layinki Xaphoomu ministirchi Temesgen Xiruneh, Dagate riqiwamaano amaale mini songaaficha Taaggese Caafo, Federeeshinete amaale mini songaaficha Agenyehu Teshaager hattono Federaaletenna Oromiyu qoqqowi jajjabba loosu massagaano leeltino.
Gaazeexu Odeessaanchinni
Bakkalcho Onkoleessa 1 / 2016
