Addis Ababa:- Jio-termaalete latishshira hasiissanno teknolooje wonshate mootimma haranchonna seeda yanna qajeelsha gobba giddonna gobbayidi gobbuwara injeessatenni mannu wolqa dhuka lossitanni afamannota shiilote ministere egensiissu.
Shiilote ministr dieeti kalaa Miliyoon Maatewoosihu Itophiyu pireesete uurrinshara xawisanni; Jio-termaalete latishshira hasi’nanni teknolooje wonshate mootimma addi addi qajeelsha injeessitanni afantanno.
Qooxeessu daga babbaxxitino loossa aana beeqqatenni wedellu qajeelsha afi’ranno gede uurrinshuwa loossanni afantanno yinohu kalaa Miliyooni; gobba giddo rosicho afidhino ogeeyye hoogguro nafa gobbayidinni dagganno ogeeyye ledo hanqafamate rosicho afidhanno gede assinanni hee’noonnita coyi’rino.
Shiilotenna Jio-termaalete handaari xiinxallotenna diime umate looso gumullanniha ikkasinni luphiima jiro hasidhanno yinohu kalaa Miliyooni; konninnino dureeyye handaaraho Investe assitanno gede qummeessino.
ledoteno gobba giddo kontiraakterooti heewisante looso gumultanno gede assinanni afammannita huwachishinno.
kalaa Miliyooni ledotenni; lee babbaxxitino gobbuwa dureeyye hattono mitte mootimmate uurrinsha handaaraho bobbakke afantannoha ikkanna hasatenna latisate mixo fushshine looso gumullanni hee’noonnita huwachishinno.
Kalaa Miliyooni xawishshi garinni; Itophiyaho assinoonni Jiolojikaalete xiinxallo garinni; xaa geeshsha 27 ikkitannori jajjabba iibbille afidhinori Jio-termaalete base Elktirike kalaqa dandiitanno. Itophiyu handaarunni xaphooma 10 kume mega watte ale kalaqate dhuka afidhino.
Shiilote handaarinni uurrinshunna yannate geeshshi loosu kaayyo kalaqantinota amadisiise kayisannohu kalaa Miliyooni; Jio-termaalete handaarinni 300 mannootira loosu kaayyo kalaqa dandiinoonnita xawisino.
Jio-termaalete handaari luphiima jiro xa’mannoha ikkasinni lame gobbayidi kubbaaniyooti wolqate hidho sumimmenna gumulote sumimme mootimmate ledo malaatisatenni lame doyichonni mittu mittunku 150 Megga watte kalaqate ummanni hee’noonnita kalaa Miliyooni xawisino.
Kalaa Miliyooni xawisanni; mootimmate kubbaaniyi widoonni 10 jajjabba buuxo assinanni balla xaphoomunni linxensa 27 kume meetire ale uma dandiinoonniha ikkanna lame ledote balla ummanni hee’noonni.
Bakkalcho Dotteessa 24, 2016 M.D
